اسلام آباد:
صدر آصف علي زرداري صدر الهام عليوف، حڪومت ۽ آذربائيجان جي عوام کي آزادي جي ڏهاڙي تي مبارڪباد ڏني آهي.
پنهنجي پيغام ۾ صدر چيو ته پاڪستان ۽ آذربائيجان آزاديءَ کان وٺي گڏيل عقيدي، ثقافتي ورثي ۽ قدرن تي ٻڌل ڀائراڻا لاڳاپا قائم ڪيا آهن.
هن چيو ته گذريل ڪيترن ئي سالن کان ٻنهي ملڪن جا لاڳاپا مضبوط پارٽنرشپ ۾ تبديل ٿيا آهن، جن جو بنياد گڏيل اعتماد، مفاهمت ۽ قومي مفاد جي معاملن تي هڪ ٻئي جي غير متزلزل حمايت آهي.
آصف علي زرداري چيو ته پاڪستان جي عوام صدر الهام عليوف جي وژنري قيادت ۾ آذربائيجان جي سماجي ۽ اقتصادي ترقي، اتحاد ۽ خوشحالي کي قدر جي نگاهه سان ڏسن ٿا.
هن ٻنهي برادر ملڪن جي وچ ۾ گهڻ طرفي تعاون کي وڌائڻ لاءِ پاڪستان جي پختي عزم کي ورجايو، خاص طور تي ٻه طرفي واپار، توانائي، دفاعي تعاون ۽ عوامي سطح تي وفدن جي تبادلي ۾.
صدر آذربائيجان جي عوام جي امن ۽ خوشحالي لاءِ نيڪ خواهشن جو اظهار پڻ ڪيو.
