اسلام آباد:
پرڏيهي فنڊنگ ڪيس ۾ عمران خان کي مرڪزي جوابدار قرار ڏيندي 57 صفحن تي ٻڌل چالان تيار ڪيو ويو آهي.
پي ٽي آءِ باني عمران خان خلاف پرڏيهي فنڊنگ ڪيس ۾ اهم اڳڀرائي ٿي آهي. ان حوالي سان ذريعن جو چوڻ آهي ته ايف آءِ اي پاران ڪيس جو چالان تيار ڪيو ويو آهي، جيڪو سڀاڻي عدالت ۾ جمع ڪرايو ويندو.
ذريعن جو چوڻ آهي ته پرڏيهي فنڊنگ ڪيس جو چالان 57 صفحن تي مشتمل آهي، جنهن ۾ 11 جوابدارن کي نامزد ڪيو ويو آهي، جڏهن ته پي ٽي آءِ جي باني کي مرڪزي جوابدار نامزد ڪيو ويو آهي.
ذريعن موجب ايف آءِ اي جي چالان ۾ طارق شفيع، حامد زمان ۽ ٻين کي شامل ڪيو ويو آهي، جڏهن ته 3 جوابدارن کي اشتهاري قرار ڏنو ويو آهي، جن ۾ عارف نقوي ۽ طارق رحيم شيخ شامل آهن.
چالان ۾ چيو ويو آهي ته پي ٽي آءِ جي اڪائونٽ ۾ دنيا جي مختلف ملڪن مان 1800 ٽرانزيڪشن ڪيون ويون ۽ اها رقم نئين پاڪستان جي نالي تي وصول ڪئي وئي.
ذريعن جو چوڻ آهي ته جوابدارن تي 2.1 ملين ڊالرن جي غيرقانوني فنڊنگ جو الزام آهي، جڏهن ته 2.1 ملين ڊالر جي رقم به ووٽ آن ڪرڪيٽ لميٽيڊ نالي ڪمپني طرفان پي ٽي آءِ کي موڪلي وئي هئي.
ايف آءِ اي جي چالان موجب پي ٽي آءِ پاران اليڪشن ڪميشن کي فراهم ڪيل رڪارڊ ۾ هن ڪمپني جي مالڪي عارف نقوي جي نالي تي ظاهر ڪئي وئي آهي ۽ پارٽي طرفان جمع ڪرايل رڪارڊ موجب اها ڪمپني ڪيمين آئرلينڊ ۾ رجسٽرڊ آهي.
جڏهن ته چالان موجب اها ڪمپني جعلي آهي ۽ ڪٿي به رجسٽر ٿيل ناهي. ذريعن موجب خاص عدالت ايف آءِ اي کي چالان جمع ڪرائڻ جي هدايت ڪئي آهي، جنهن تي عمل ڪندي جلد چالان عدالت ۾ پيش ڪيو ويندو.
بئنڪنگ ڪورٽ ۾ ڪيس جي ٻڌڻي ٿي
ٻئي طرف اسلام آباد جي بينڪنگ ڪورٽ ۾ پي ٽي آءِ جي باني ۽ ٻين خلاف پرڏيهي فنڊنگ ڪيس جي ٻڌڻي ٿي، جتي خاص عدالت جي جج عبدالغفور ڪاڪڙ ڪيس جي ٻڌڻي ڪئي. ان دوران اسپيشل پراسيڪيوٽر واثق ملڪ ۽ جاچ آفيسر عدالت ۾ پيش ٿيا.
ٻڌڻي دوران جج عبدالغفور ڪاڪڙ چالان جي صورتحال بابت پڇاڻو ڪيو، جنهن تي پراسيڪيوٽر واثق ملڪ عدالت کي ٻڌايو ته چالان مڪمل تيار ٿي چڪو آهي، اڄ يا سڀاڻي رجسٽرار وٽ جمع ڪرايو ويندو.
جنهن بعد عدالت اهم ڪيس جي ٻڌڻي 21 اپريل تائين ملتوي ڪري ڇڏي، جڏهن ته ڪيس ۾ نامزد جوابدارن سراج احمد ۽ فيصل قاضي جي عبوري ضمانت ۾ به 21 اپريل تائين واڌ ڪئي وئي، ٻڌڻي دوران جوابدار فيصل قاضي جي عدم حاضري سبب ضمانت واري درخواست تي دليل نه ٿي سگهيا.
ان موقعي تي پراسيڪيوٽر واثق ملڪ موقف اختيار ڪيو ته جوابدار عدالت کي آگاهي کانسواءِ پرڏيهه ڪيئن وڃي سگهن ٿا. وڪيل صفائي چيو ته فيصل قاضي دبئي ۾ خانگي بئنڪ جو سربراهه آهي ۽ هر ٻڌڻي تي پاڪستان ايندو آهي. جنهن تي جج عبدالغفور ڪاڪڙ رمارڪس ڏيندي چيو ته ايندڙ پيشي تي جوابدار پيش نه ٿيا ته معاملي جي جاچ ڪئي ويندي.
ياد رهي ته ايف آءِ اي پي ٽي آءِ جي باني ۽ ٻين خلاف مني لانڊرنگ ۽ ٻين الزامن تحت ڪيس داخل ڪيو آهي.
