غزه ۾ جنگبندي جي باوجود اسرائيلي حملن جو سلسلو جاري آهي. فلسطيني طبي اختيارين موجب تازين حملن ۾ 9 سالن جي ٻارڙي سميت 6 فلسطيني مارجي ويا، جڏهن ته ڪيترائي زخمي ٿي پيا.
طبي ذريعن موجب غزه جي مرڪزي علائقي البريج جي پناهگير ڪيمپ جي اوڀر واري علائقي ۾ بي گهر ٿيل خاندانن جي خيمن تي اسرائيلي فائرنگ جي نتيجي ۾ 9 ورهين جو طلا ابو متر مارجي ويو. اسرائيلي فوج واقعي کان لاعلمي جو اظهار ڪندي چيو آهي ته ان کي حملي بابت فوري طور تي ڪا به ڄاڻ ناهي.
ان دوران هڪ اسرائيلي هوائي حملو غزه شهر جي صابرا واري علائقي ۾ هڪ ميٽل ورڪنگ ورڪشاپ کي نشانو بڻايو، جتي اکين ڏٺن شاهدن موجب ٽي ميزائل فائر ڪيا ويا. حملي ۾ گهٽ ۾ گهٽ چار ڄڻا مارجي ويا.
اسرائيلي فوج هڪ بيان ۾ چيو ته هن دهشتگردن جي ٺڪاڻن کي نشانو بڻايو، پر دعويٰ جي حمايت لاءِ ڪو ثبوت يا وڌيڪ تفصيل فراهم نه ڪيو.
ڏکڻ غزا جي علائقي المواسي، خان يونس ۾ بي گهر ماڻهن جي خيمن تي اسرائيلي حملي ۾ هڪ شخص مارجي ويو ۽ ڪيترائي زخمي ٿي پيا. زخمين ۾ ڪيترائي ٻار به شامل آهن. اسرائيلي فوج فوري طور تي حملي تي تبصرو نه ڪيو.
تازو حملا ان وقت ٿيا آهن جڏهن حماس جو هڪ وفد مصر جي گادي واري هنڌ قاهره ۾ جنگبندي جي ٻئي مرحلي تي ڳالهين لاءِ پهتو آهي.
ذريعن موجب ڳالهين ۾ حماس کي غير مسلح ڪرڻ، اسرائيلي فوج جي واپسي ۽ آمريڪي امن منصوبي تي عمل سميت مختلف معاملن تي ڳالهه ٻولهه ٿي رهي آهي پر هن وقت تائين ڪا خاص اڳڀرائي نه ٿي سگهي آهي.
آڪٽوبر 2025 جي جنگبندي باوجود غزه ۾ اسرائيلي حملا مڪمل طور بند نه ٿيا آهن. فلسطيني اختيارين موجب جنگبندي جي عمل ۾ اچڻ کان وٺي مختلف حملن ۾ هڪ هزار کان وڌيڪ فلسطيني مارجي ويا آهن، جڏهن ته ان دوران 4 اسرائيلي فوجي پڻ مارجي ويا آهن.
تجزيه نگارن موجب غزه ۾ جاري تشدد ۽ ڳالهين ۾ تعطل خطي ۾ پائيدار امن جي راهه ۾ وڏي رڪاوٽ آهي.
