ڪراچي:
ناڻي واري صلاحڪار عدنان پاشا چيو آهي ته پاڪستان کي عالمي مالياتي ادارن مان وڏي مدد ملي رهي آهي، ملڪ کي رڳو معاشي استحڪام تائين محدود نه رهڻ گهرجي پر ترقي جي راهه تي به گامزن ٿيڻ گهرجي، مصنوعي ذهانت انشورنس شعبي ۾ انقلاب آڻي سگهي ٿي.
ڪراچي ۾ پهرئين انٽرنيشنل انشورنس ڪانفرنس کي خطاب ڪندي هن چيو ته پاڪستان دنيا جي انهن ملڪن ۾ شامل آهي جيڪي موسمياتي تبديليءَ کان سڀ کان وڌيڪ متاثر ٿيا آهن. سنڌ ۾ تازين ٻوڏن سبب ٻه هزار کان وڌيڪ ماڻهو فوت ٿي ويا. مالوندن جو وڏو نقصان ٿيو، فصل تباهه ٿيا ۽ لکين ماڻهو غربت جي لڪير کان هيٺ دٻيل آهن. مون سون جون برساتون هر سال تباهي مچائينديون آهن جڏهن ته ملڪ کي ٻوڏ ۽ ڏڪار جهڙن مسئلن کي منهن ڏيڻو پوي ٿو.
عدنان پاشا چيو ته پاڪستان ۾ انشورنس جو شعبو تمام محدود آهي ۽ صرف 7 لک ماڻهن جي لائف انشورنس آهي. هن چيو ته انشورنس جي واڌاري ۾ سڀ کان وڏي رڪاوٽ پاليسي نه پر عوام ۾ شعور جي کوٽ ۽ تقسيم جا مسئلا آهن.
هن چيو ته وزيراعظم پاران متعارف ڪرايل مختلف اسڪيمن جو مقصد انشورنس کي عام ماڻهو تائين پهچائڻ آهي. زرعي شعبي جي حوالي سان هن چيو ته اسپارڪو ذريعي پاڪستاني بئنڪن کي فصلن جي ڊيٽا فراهم ڪئي پئي وڃي جنهن سان زرعي قرضن ۽ پيداوار جو صحيح اندازو لڳائي سگهجي ٿو.
ناڻي واري صلاحڪار چيو ته خطي جي صورتحال جا اثر پاڪستان تي به پئجي رهيا آهن، اهڙي صورتحال ۾ انشورنس سيڪٽر کي مضبوط ڪرڻ ضروري آهي. هن ان ڳالهه تي زور ڏنو ته مصنوعي ذهانت انشورنس جي واڌاري ۾ اهم ڪردار ادا ڪري سگهي ٿي ۽ ان ذريعي خدمتن کي بهتر بڻائي سگهي ٿي.
هن وڌيڪ چيو ته فرٽيلٽي،اپنا گهر ۽ نيو انرجي سميت سرڪاري اسڪيمن ۾ انشورنس جا وسيع موقعا موجود آهن ۽ ناڻي واري وزارت ان شعبي کي هٿي وٺرائڻ لاءِ هر ممڪن سهڪار ڪرڻ لاءِ تيار آهي.
ڪانفرنس کي پنهنجي خطاب ۾ سنڌ جي وڏي وزير سيد مراد علي شاهه چيو ته ايڪٽوريل اسٽڊيز جي شعبي ۾ شاگردن جي دلچسپي قابل ذڪر آهي، سنڌ حڪومت صنعت جي ڪارڪردگي کي وڌائڻ لاءِ هر ممڪن سهڪار ڪرڻ لاءِ تيار آهي، آءِ اي پي ۽ پي ايس او اي سان گڏيل قدمن جي آجيان ڪندس، سنڌ حڪومت انشورنس انڊسٽري جي اهميت ۽ معيشت جي ترقي ۾ ان جي اهم ڪردار کي مڪمل طور تي سمجهندي آهي.
مراد علي شاهه چيو ته انشورنس انڊسٽري سنڌ صوبي جي وڏي سيلز ٽيڪس ادا ڪندڙ صنعتن مان هڪ آهي، سنڌ حڪومت پهرين صوبائي حڪومت آهي جنهن ٿرڊ پارٽي گاڏين جي انشورنس متعارف ڪرائي آهي، ٽريفڪ حادثي ۾ فوت يا مستقل معذور ٿيڻ وارن کي 45 ڏينهن اندر ڪليم ڏنا ويندا.
هن چيو ته هن وقت تائين 2 لک گاڏين کي ٿرڊ پارٽي موٽر گاڏين جي انشورنس فراهم ڪئي وئي آهي، سنڌ حڪومت فصلن جي انشورنس سيلز ٽيڪس فري ڪئي آهي، سنڌ حڪومت سنڌ سوشل پروٽيڪشن اٿارٽي ذريعي شهرين کي سوشل سيڪيورٽي فراهم ڪري رهي آهي، حادثاتي موت جي صورت ۾ 18 سالن کان مٿي عمر جي هر فرد کي انشورنس ڪوريج ملندي.
ڪانفرنس کي خطاب ڪندي انشورنس ايسوسيئيشن جي چيئرمين ۽ اسٽيٽ لائف انشورنس جي چيف ايگزيڪيوٽو شعيب جاويد حسن چيو ته پاڪستان ۾ انشورنس انڊسٽري پهريون ڀيرو گڏ ٿي آهي ته جيئن پاڪستانين کي بهتر خدمتون فراهم ڪيون وڃن.
هن چيو ته انشورنس انڊسٽري جو ڪنهن به معيشت جي ترقي لاءِ اهم ڪردار هوندو آهي، پاڪستان ۾ انشورنس جو دخل خطي جي ٻين ملڪن جي ڀيٽ ۾ 4 سيڪڙو جي مقابلي ۾ 0.9 سيڪڙو آهي، پاڪستان خطي ۾ سڀ کان گهٽ انشورنس ڪوريج رکي ٿو، پاڪستان ۾ انشورنس جي ترقي جا تمام گهڻا موقعا موجود آهن، نوجوان وڌندڙ آبادي ۾ انشورنس انڊسٽري ۾ اڳتي وڌڻ جا ڪيترائي موقعا موجود آهن.
وزيراعظم جي واپار بابت ڪوآرڊينيٽر احسن افضل رانا ڳالهائيندي چيو ته ملڪ گذريل 4 کان 5 سالن کان ميڪرو اڪنامڪ چئلينجن کي منهن ڏئي رهيو آهي.
احسن افضل رانا چيو ته حڪومت معاشي ٽرانزيڪشن کي ڊجيٽلائيز ڪرڻ چاهي ٿي، وزيراعظم هر هفتي ايف بي آر سان ملاقات ڪندو آهي، ايف بي آر جي ٽيڪس روينيو ۾ واڌ ٿي رهي آهي، حڪومت جو مقصد ننڍن ۽ وچولي ڪاروبار کي دستاويز ڪرڻ ۽ انهن کي مالي خدمتن تائين پهچ ڏيڻ آهي، ايس ايم ايز جي حوالي سان اسٽيٽ بينڪ سان ڪم ڪري رهيا آهيون.
هن وڌيڪ چيو ته موبائل فون استعمال ڪندي آبادي جي وڏي حصي کي مائيڪرو انشورنس فراهم ڪري سگهجي ٿي، انشورنس انڊسٽري سان گڏ جوائنٽ ورڪنگ گروپ قائم ڪيو وڃي ته جيئن جيڪي به قانوني ۽ ريگيوليٽري مسئلا آهن انهن کي حل ڪيو وڃي، اسٽيٽ بئنڪ زرعي انشورنس اسڪيم کي اپ گريڊ ڪري رهي آهي، انفراسٽرڪچر جي ترقي لاءِ ڪم ڪيو ويو آهي.
