لبنان جو صدر جوزف عون 4 ڏينهن جي دوري تي آمريڪا پهتو هو، جتي هن پنهنجي دوري جي آخري ڏينهن وائيٽ هائوس ۾ صدر ٽرمپ سان اهم ملاقات ڪئي.
عالمي خابرو اداري موجب آمريڪا ۽ لبنان جي صدرن وچ ۾ ٿيل ان اهم ملاقات ۾ لبنان ۽ اسرائيل جي لاڳاپن، حزب الله کي هٿيارن جي خاتمي، ايران سان جاري ڇڪتاڻ، شام جي صورتحال ۽ وچ اوڀر ۾ امن جي امڪانن تي خيالن جي ڏي وٺ ڪئي وئي.
اوول آفيس ۾ ملاقات جي شروعات ۾ صدر ٽرمپ چيو ته آمريڪا لبنان جي هر ممڪن مدد ڪندو. هي ملڪ ڏهاڪن کان مصيبت ۾ آهي. هاڻي کيس اها عزت ملندي جنهن جو هو حقدار آهي.
صدر ٽرمپ وڌيڪ چيو ته حزب الله لبنان کي هن وقت سڀ کان وڏو مسئلو درپيش آهي پر آمريڪا ان حوالي سان موثر قدم کنيا آهن، جنهن جا نتيجا دنيا جلد ڏسندي.
ملاقات ۾ لبنان-اسرائيل لاڳاپن ۽ لبناني حڪومت پاران حزب الله کي غير مسلح ڪرڻ جي ڪوششن تي پڻ خيالن جي ڏي وٺ ڪئي وئي.
صدر ٽرمپ هڪ ڀيرو ٻيهر ايران خلاف پنهنجي پاليسي جو دفاع ڪندي چيو آهي ته جيڪڏهن آمريڪا ايران خلاف سخت قدم نه کڻي ها ته اڄ اسرائيل جو وجود نه هجي ها.
هن دعويٰ ڪئي ته جيڪڏهن اڳوڻي صدر باراڪ اوباما جو ايٽمي معاهدو برقرار رهي ها ته ايران سال اڳ ايٽمي هٿيار حاصل ڪري وٺي ها.
صدر ٽرمپ وڌيڪ چيو ته آمريڪي بي-2 بمبارن جي ڪارروائي ايران جي ايٽمي سهولتن کي سخت نقصان پهچايو، ايران جي ايٽمي صلاحيت کي وڏو ڌڪ لڳو.
آمريڪي صدر دعويٰ ڪئي ته ايران هاڻي جنگ جي خاتمي لاءِ بيتاب آهي ۽ ڳالهين جاري رکڻ جو خواهشمند آهي.
صدر ٽرمپ موجب جيستائين ايران سنجيده ۽ بامقصد ڳالهين لاءِ تيار ناهي آمريڪا کي ان سان ڳالهين ۾ ڪا به دلچسپي ناهي.
آمريڪي صدر چيو ته اسرائيل ڏکڻ لبنان ۾ پنهنجي فوجي پوزيشن کي بحال ڪري رهيو آهي. جڏهن صدر ٽرمپ کان پڇيو ويو ته ڏکڻ لبنان مان مڪمل اسرائيلي واپسي بابت، هن چيو ته هو معاملي جو جائزو وٺندو پر ڪو واضح ٽائيم نه ڏنو.
صدر ٽرمپ اهو پڻ تسليم ڪيو ته ايران اردن ۾ حملي ۾ آمريڪي دفاعي نظام کي جزوي طور تي ڀڄڻ جي قابل هو. جيڪڏهن ڪي مختلف آپريشنل انتظام هجن ها ته اهو حملو ڪامياب نه ٿئي ها.
واضح رهي ته گذريل هفتي اردن ۾ ايراني ميزائل ۽ ڊرون حملي ۾ ٻه آمريڪي فوجي مارجي ويا هئا.
شام بابت پڇيل سوال تي صدر ٽرمپ چيو ته جيڪڏهن شامي صدر احمد الشريعه حزب الله خلاف ڪارروائي ڪرڻ چاهي ٿو ته اهو هڪ قابل عمل آپشن آهي.
هن چيو ته احمد الشريعه شام کي متحد ڪرڻ ۾ سٺو ڪردار ادا ڪيو آهي ۽ جيڪڏهن هو حزب الله خلاف ڪارروائي ڪري ته اهو اثرائتو ثابت ٿي سگهي ٿو.
صدر ٽرمپ ايران تي الزام لڳايو آهي ته هو آبنائي هرمز کي خطرو ڪري نومبر ۾ ٿيندڙ آمريڪي مڊٽرم چونڊن تي اثرانداز ٿيڻ جي ڪوشش ڪري رهيو آهي.
بهرحال، هن چيو ته هو چونڊ سياست بدران صحيح فيصلا ڪرڻ تي ڌيان ڏيندو ۽ کيس يقين آهي ته آمريڪي عوام سندس پاليسين جي حمايت ڪري رهيا آهن.
ان موقعي تي لبناني صدر جوزف عون صدر ٽرمپ کي عظيم صدر قرار ڏيندي چيو ته آمريڪا جي ثالثي ۾ گذريل مهيني طئي ٿيل فريم ورڪ معاهدو لبنان ۽ اسرائيل وچ ۾ دشمني ختم ڪرڻ جو بنياد بڻجي سگهي ٿو.
هن وڌيڪ چيو ته لبنان ۽ سڄي خطي کي هاڻي استحڪام ۽ امن جي ضرورت آهي ۽ سندس امن جو ويزن صدر ٽرمپ جي ويزن سان مطابقت رکي ٿو.
لبناني صدر جوزف عون ان اميد جو اظهار ڪيو ته ٻئي ملڪ لبنان ۽ اسرائيل جي وچ ۾ پائيدار امن لاءِ راهه هموار ڪرڻ لاءِ گڏجي ڪم ڪندا.
