اسلام آباد:
پاڪستان ۾ معاشي پاليسين تي اشرافيه جي اثر ۽ رسوخ جي حوالي سان بحث تيز ٿي ويو آهي.
ماهرن موجب ٽيڪس ڪسٽم ڊيوٽي ۽ مختلف شعبن کي ڏنل خاص رعايتون قومي معيشت بدران محدود بااثر طبقي کي فائدو پهچائي رهيون آهن.
رپورٽ موجب فيڊرل بورڊ آف روينيو (ايف بي آر) طرفان سيلز ٽيڪس، انڪم ٽيڪس ۽ ڪسٽم ڊيوٽي جي مد ۾ ڏنل استثنيٰ ۽ رعايتن جو حجم 2435 ارب رپين تائين پهچي ويو آهي، جيڪو ايف بي آر جي مجموعي ٽيڪس وصولين جو چوٿون حصو آهي.
آرٽيڪل ۾ چيو ويو آهي ته گذريل پنجن سالن دوران ڪسٽم ڊيوٽي ۾ ڏنل رعايتون 288 ارب رپين مان وڌي 652 ارب رپيا ٿي ويون. نقادن جي مطابق، انهن ترغيبات صنعتن کي وڌيڪ مقابلي بازي ڪرڻ بجاءِ محفوظ منافعي کي فروغ ڏنو.
آٽو موبائيل ۽ موبائيل فون اسيمبلي جي شعبن کي مثال طور پيش ڪندي چيو ويو ته ڊگهي مدي جي خصوصي مراعتن جي باوجود انهن شعبن ۾ برآمدات، ٽيڪنالاجي جي منتقلي ۽ مقامي قدر ۾ اضافو نه ٿي سگهيو آهي.
آرٽيڪل موجب حڪومت مالي سال 2025ع جي بجيٽ ۾ 5 سالن جو ايڪسپورٽ آرينٽيڊ اقتصادي روڊ ميپ اختيار ڪيو آهي، جنهن جا شروعاتي نتيجا سامهون اچي رهيا آهن.
هلندڙ مالي سال جي پهرين 9 مهينن دوران ڪسٽم ڊيوٽي جي رعايتن ۾ 65 ارب رپين جي گهٽتائي رڪارڊ ڪئي وئي آهي.
ماهرن موجب حڪومت کي سڌارن جو عمل جاري رکڻ گهرجي ۽ خاص مفاد پرست گروهن جي دٻاءُ هيٺ پاليسين ۾ نرمي نه ڪرڻ گهرجي ته جيئن پاڪستان مقابلي ۽ برآمداتي معيشت ڏانهن وڌي سگهي.
