اسلام آباد:
وزيراعظم شهباز شريف پنهنجو گهر اسڪيم جي شروعات ڪندي اعلان ڪيو آهي ته هو ايندڙ وفاقي بجيٽ ۾ عوام کي وڏيون سهولتون ڏيندو.
وفاقي راڄڌاني ۾ منعقد تقريب کي خطاب ڪندي شهباز شريف ايندڙ بجيٽ جي حوالي سان خوشخبري ڏيندي چيو ته حڪومت عوام جي ڀلائي لاءِ اهم ۽ نمايان قدم کڻڻ جي تياري ڪري رهي آهي.
تقريب کي خطاب ڪندي وزيراعظم چيو ته ان اسڪيم تحت شهرين کي آسان شرطن تي هڪ ڪروڙ رپين تائين جا قرض فراهم ڪيا ويندا ته جيئن هو پنهنجا گهر ٺاهي سگهن. منصوبي کي ملڪ جي چئني صوبن سميت گلگت بلتستان ۽ آزاد ڪشمير تائين وڌايو ويو آهي، جنهن جو مقصد وڌ کان وڌ ماڻهن کي فائدو پهچائڻ آهي.
هن چيو ته ملڪ ۾ وڏي تعداد ۾ اهڙا ماڻهو آهن جيڪي پنهنجي گهرن کان محروم آهن. انهن کي گهر فراهم ڪرڻ هڪ اهم قومي ذميواري آهي. قرض وٺندڙن کي مبارڪباد ڏيندي وزيراعظم يقين ڏياريو ته عام ماڻهو کي ڇت فراهم ڪرڻ حڪومت جي اولين ترجيح هوندي.
وزيراعظم چيو ته حڪومت منصوبي جي پهرين مرحلي ۾ 50 هزار گهرن لاءِ قرض فراهم ڪرڻ جو هدف مقرر ڪيو آهي ۽ ان مقصد لاءِ 50 ارب رپين جي فنانسنگ ڪئي ويندي. 321 ارب رپيا مختص ڪيا ويا آهن. هن چيو ته رهائشي ضرورتن کي پورو ڪرڻ لاءِ ايندڙ 4 سالن ۾ 5 لک گهرن جي تعمير جو هدف مقرر ڪيو ويو آهي.
تقريب کي خطاب ڪندي وزيراعظم چيو ته ان اسڪيم جو ڪل حجم 3.2 کرب رپين تائين پهچندو، جنهن تحت 10 مرله تائين جي پلاٽن تي گهر ٺاهڻ جون سهولتون فراهم ڪيون وينديون. وزيراعظم يقين ڏياريو ته هو پاڻ هر مهيني منصوبي جي اڳڀرائي جو جائزو وٺندو ته جيئن ان تي عملدرآمد موثر انداز ۾ جاري رهي.
وزيراعظم چيو ته ان اسڪيم ۾ فعال ڪردار ادا ڪندڙ بئنڪن کي خاص طور ساراهيو ويندو ۽ 14 آگسٽ جي موقعي تي نمايان ڪارڪردگي ڏيکاريندڙ ادارن کي ايوارڊ پڻ ڏنا ويندا.
هن چيو ته ان قدم سان نه رڳو تعميراتي شعبي ۾ پر صنعت ۽ واپار ۾ به سرگرميون وڌنديون ۽ معيشت ۾ بهتري جا آثار پيدا ٿيندا.
