پاڪستاني گهرو وزير محسن نقوي هنگامي بنيادن تي ايران پهتو جنهن ۾ صدر مسعود پاشڪي ۽ پرڏيهي وزير عباس عراقچي سان ملاقات ڪئي ۽ 21 جون آچر تي سوئٽزرلينڊ ۾ ٿيندڙ ڳالهين تي خيالن جي ڏي وٺ ڪئي.
عالمي خابرو اداري موجب ايراني صدر مسعود پاشڪيان محسن نقوي سان ملاقات ۾ آمريڪا-ايران سيز فائر ڳالهين ۾ پاڪستان جي ڪردار کي ساراهيو ۽ خاص طور تي پاڪستاني قيادت جو شڪريو ادا ڪيو.
هن وڌيڪ چيو ته ڳالهين جي عمل ۾ پاڪستان جي برادرانه ۽ ذميوار سفارتڪاري جنگ بندي معاهدي تائين پهچڻ ۽ ڳالهين جي نتيجن کي مستحڪم ڪرڻ ۾ اهم ڪردار ادا ڪيو.
صدر پاشڪيان چيو ته پاڪستان تازي بحران دوران ذميوار، متوازن ۽ برادرانه سفارتڪاري جو مظاهرو ڪيو، جنهن جنگ بندي معاهدي جي راهه هموار ڪئي ۽ ڳالهين جي عمل کي مستحڪم ڪيو.
هن ان اميد جو اظهار ڪيو ته ايران ۽ پاڪستان خطي ۾ امن، استحڪام ۽ گڏيل تعاون جي فروغ لاءِ مستقبل ۾ به ويجها لاڳاپا برقرار رکندا.
ٻنهي ملڪن جي وچ ۾ تاريخي، مذهبي ۽ ڀائراڻن لاڳاپن کي وڌيڪ مضبوط ڪرڻ جي ضرورت تي زور ڏيندي صدر چيو ته هي ويجهو تعاون نه رڳو ٻنهي ملڪن جي امن ۽ ترقي لاءِ پر پوري خطي جي لاءِ به اهم آهي.
پاڪستان جي گهرو وزير محسن نقوي ايراني صدر کي خطي ۾ امن، ڳالهين ۽ ڇڪتاڻ جي خاتمي لاءِ پاڪستان جي مسلسل حمايت جو يقين ڏياريو.
ان موقعي تي هن وڌيڪ چيو ته پاڪستان هميشه تڪرارن جي پرامن حل، سفارتڪاري ۽ علائقائي استحڪام جو حامي رهيو آهي ۽ مستقبل ۾ به ان ئي پاليسي تي عمل ڪندو رهندو.
ان کان علاوه ٻنهي اڳواڻن پاڪستان ۽ ايران جي وچ ۾ ٻطرفن لاڳاپن، سرحدي تعاون، واپار، علائقائي سلامتي ۽ وچ اوڀر جي تازي صورتحال تي به خيالن جي ڏي وٺ ڪئي.
