پاڪستان ۽ چين جي وچ ۾ سفارتي لاڳاپن کي 75 سال مڪمل ٿيڻ تي لاهور ۾ تاريخي ۽ پروقار تقريب ڪوٺائي وئي، جنهن ۾ ٻنهي ملڪن جي ڊگهي دوستي، تعاون ۽ گڏيل ترقي جي سفر کي خراج تحسين پيش ڪيو ويو.
پنجاب جي وڏي وزير مريم نواز شريف جي هدايتن تي نئين ميوزيم جي عمارت ۾ خاص ”پاڪستان-چين فرينڊشپ گيلري“ قائم ڪئي وئي، جنهن جو مقصد ٻنهي ملڪن جي تاريخي لاڳاپن، ثقافتي لاڳاپن ۽ اقتصادي ڀائيواري کي نئين نسل تائين اجاگر ڪرڻ آهي.
تقريب ۾ چيني قونصل جنرل، سرڪاري عملدارن، اسلام آباد مان آيل مهمانن ۽ زندگي جي مختلف شعبن سان تعلق رکندڙ ماڻهن شرڪت ڪئي. سينيئر صوبائي وزير مريم اورنگزيب ۽ چيني قونصل جنرل گڏيل طور ثقافتي نمائش جو افتتاح ڪيو، جڏهن ته مريم اورنگزيب پاڪ چين سفارتڪاري، سي پيڪ ۽ تاريخي لاڳاپن تي فوٽو نمايان ۽ خصوصي گيلري جو معائنو پڻ ڪيو.
ان موقعي تي ڳالهائيندي مريم اورنگزيب چيو ته اڄ پاڪستان ۽ چين جي وچ ۾ دوستي جي تاريخي سالگرهه ملهائي پئي وڃي، جيڪو رڳو ٻن پاڙيسري ملڪن وچ ۾ نه پر اعتماد، خلوص ۽ قربانين تي ٻڌل لاڳاپو آهي. هن چيو ته پاڪستان ۽ چين جي دوستي هماليه کان بلند، سمنڊ کان اونهي، ماکيءَ کان مٺي ۽ فولاد کان وڌيڪ مضبوط آهي، جنهن ڪري دنيا ان کي ”سڀني موسمن جي دوستي“ سڏي ٿي.
سينيئر صوبائي وزير چيو ته هي رشتو ريشم روڊ جي تاريخي ورثي ۾ جڙيل آهي ۽ وقت جي امتحان ۾ پورو آهي. هن ياد ڏياريو ته 2015 پاڪستان-چين لاڳاپن ۾ هڪ اهم سنگ ميل هو، جڏهن صدر شي جن پنگ جي پاڪستان جي دوري دوران چائنا-پاڪستان اقتصادي راهداري (سي پيڪ) جو اعلان ڪيو ويو هو. مريم اورنگزيب موجب 2013ع جي چونڊن کانپوءِ صدر شي جن پنگ اڳوڻي وزيراعظم نواز شريف سان واعدو ڪيو هو ته هو پاڪستان لاءِ ”تحفه“ آڻيندو ۽ اهو تحفو سي پيڪ جي صورت ۾ آيو.
هن چيو ته صدر شي جن پنگ ۽ وزيراعظم شهباز شريف جا لاڳاپا رڳو سفارتڪاري تائين محدود نه آهن پر ذاتي اعتماد ۽ ويجهن ڀائيواري جو مثال آهن. سندس چوڻ هو ته پنجاب جي وڏي وزير مريم نواز شريف جي اڳواڻي ۾ اهو تعاون هاڻي پنجاب جي معاشي ماڊرنائيزيشن، زرعي ترقي، گرين انفراسٽرڪچر، سمارٽ سٽيز ۽ صنعتي شعبي ڏانهن وڌي رهيو آهي. پنجاب حڪومت جديد زراعت، هوا جي معيار کي بهتر بڻائڻ، زرعي مشينري ۽ ٽيڪنالاجي جي شعبن ۾ چيني صوبن سان تعاون جون نيون آڇون پڻ ڪيون آهن.
تقريب جي شرڪت ڪندڙن ان ڳالهه تي زور ڏنو ته پاڪستان ۽ چين جا لاڳاپا هاڻي رڳو حڪومتي سطح تائين محدود نه رهيا آهن پر هي دوستي گهرن ۽ نسلن تائين منتقل ٿي چڪي آهي. مريم اورنگزيب چيو ته منهنجي ناني ۽ ماءُ به پاڪ چين دوستي جون ڳالهيون ڪنديون هيون ۽ هاڻي اسان پنهنجي ٻارن کي ان لاڳاپي جي وضاحت ڪريون ٿا.
هن لاهور جي نوجوانن کي اپيل ڪئي ته هو ميوزيم ۾ هن خاص نمائش جو دورو ڪن ڇو ته هي نمائش پاڪستان ۽ چين دوستي جي 75 سالن جي سفر، گڏيل ڪاميابين ۽ مستقبل جي ويزن جي عڪاسي ڪري ٿي. هن چيو ته هي 75 سال صرف ماضي جي ياد نه پر گڏيل مستقبل جي نئين شروعات آهن.
ان موقعي تي مريم اورنگزيب اهو به چيو ته چين هر ڏکئي وقت ۾ پاڪستان جو ساٿ ڏنو آهي، آپريشن بني المرسوس هجي يا حق جي جنگ، ٻئي ملڪ هميشه هڪ ٻئي سان گڏ بيٺا آهن. هن اعلان ڪيو ته پاڪ-چين دوستي جي 75 هين سالگرهه جي حوالي سان هڪ خاص تقريب 25 مئي تي ايڪسپو سينٽر لاهور ۾ ملهائي ويندي، جنهن ۾ پنجاب جي وڏي وزير مريم نواز شريف شرڪت ڪندي.
تقريب جي پڄاڻي تي ماحول ”پاڪستان زنده باد“ ۽ ”پاڪستان چين دوستي زنده باد“ جي نعرن سان گونجي ويو، جڏهن ته شرڪت ڪندڙن ان عزم جو اظهار ڪيو ته ٻنهي ملڪن وچ ۾ اهو لاڳاپو مستقبل ۾ به امن، ترقي ۽ خوشحالي جو ضامن هوندو.
