پيٽرول جي اگهن ۾ واڌ خلاف ٽرانسپورٽ يونين جو ردعمل، ڪنهن به وقت هڙتال جو سڏ ڏنو ويندو

پاڪستان گڊز ٽرانسپورٽ الائنس جي صدر ملڪ شهزاد اعواڻ وفاقي حڪومت طرفان پيٽروليم شين جي اگهن ۾ واڌ جي سخت مذمت ڪندي ان تبديلي کي رد ڪندي اعلان ڪيو آهي ته ڪنهن به وقت ملڪ گير هڙتال جو سڏ ڏنو ويندو. پاڪستان گڊز ٽرانسپورٽ الائنس جي صدر ملڪ شهزاد اعواڻ چيو آهي ته هو وفاقي حڪومت پاران پيٽروليم شين جي قيمتن ۾ روزاني جي بنياد تي تبديلي جي فيصلي کي رد ڪن ٿا ۽ ان حوالي سان پاڪستان جي ٽرانسپورٽ ايسوسيئشنز سان مشاورت جاري آهي. هن چتاءُ ڏنو ته هو وفاقي حڪومت جي غلط پاليسين خلاف تمام جلد ملڪ گير هڙتال جو اعلان ڪندا، سڄي پاڪستان جا ٽرانسپورٽر تيار رهن، ڪنهن به وقت ملڪ گير هڙتال جو سڏ ڏنو ويندو. گڊز ٽرانسپورٽ الائنس جي صدر چيو ته وفاقي حڪومت جي غلط پاليسين ۽ ڊيزل جي اگهن ۾ مسلسل واڌ سبب اسان جي ٽرانسپورٽ بيٺي آهي، وفاقي حڪومت اهڙا فيصلا ڪري رهي آهي جيڪي ٽرانسپورٽرن سان دشمني آهن. هن پاڪستان جي چيمبرز ۽ فيڊريشنز کان مطالبو ڪيو ته هو ان معاملي ۾ ڪردار ادا ڪن. ملڪ شهزاد اعواڻ مطالبو ڪيو ته ٽول ٽيڪس ۽ ود هولڊنگ ٽيڪس ۾ اضافو به فوري طور تي واپس ورتو وڃي، اسان وفاقي حڪومت کان ٽال ٽيڪس، ود هولڊنگ ٽيڪس سميت هاءِ وي ۽ ٽريفڪ پوليس جي چالان ۾ رليف جو مطالبو ڪري رهيا آهيون پر وفاقي ۽ صوبائي حڪومتون سامان ٽرانسپورٽرن کي ڪنهن به قسم جو رليف نه ڏئي رهيون آهن. هن چيو ته ملڪ جي وسيع تر مفاد ۾ گاڏيون خساري ۾ هلي رهيون آهن ۽ جنگي صورتحال سبب اسان جو ٽرانسپورٽ جو ڪاروبار تمام گهڻو متاثر ٿيو آهي پر وفاقي حڪومت اسان کي ملڪ گير هڙتال تي مجبور ڪري رهي آهي. ملڪ شهزاد اعواڻ وڌيڪ چيو ته ڊسمبر جي ملڪ گير هڙتال ۾ وفاقي ۽ صوبائي حڪومتون جيڪي واعدا ڪيا هئا انهن تي به عمل ڪيو وڃي.



Source link