پيٽروليم شين جي اگهن ۾ واڌ واري معاملي تي پيٽرول پمپ اونرز ايسوسيئيشن جي سڏ تي ڪراچي، لاهور ۽ خيبرپختونخواهه جي مختلف علائقن ۾ روزاني جي بنياد تي ڪيترائي پمپ بند آهن.
رپورٽ موجب پنجاب جي صوبائي راڄڌاني جي مختلف علائقن ۾ پيٽرول پمپ بند آهن، لاهور سميت ڀرپاسي وارن علائقن ۾ 150 کان وڌيڪ پيٽرول پمپ بند آهن، جنهن سبب ماڻهو سخت ڏکيائين کي منهن ڏئي رهيا آهن.
اهڙي طرح ڪراچي جي مختلف علائقن ۾ پمپ بند ٿيڻ جا اطلاع آهن. ٻئي طرف خيبرپختونخواهه ۾ پيٽروليم ايسوسيئيشن مطالبن جي حق ۾ اڻڄاتل هڙتال شروع ڪري ڇڏي آهي، جنهن سبب صوبي ۾ ڪيترائي پيٽرول پمپ مڪمل يا جزوي طور بند آهن.
مالاڪنڊ ڊويزن جي ضلعن لوئر دير، اپر دير، چترال، باجوڑ، سوات، مالاڪنڊ، شانگلا ۽ بونير ۾ پيٽرول پمپ مالڪن جي هڙتال جاري آهي، جنهن سبب گذريل رات کان سمورا ننڍا توڙي وڏا پيٽرول پمپ بند آهن.
پيٽرول پمپ بند ٿيڻ سبب گاڏين کي ايندھن جي فراهمي معطل آهي، جڏهن ته ٽرانسپورٽر برادري ۽ شهرين کي سخت پريشانين کي منهن ڏيڻو پئجي رهيو آهي. هڙتال سبب روڊن تي پبلڪ ٽرانسپورٽ به بي حال ٿي وئي آهي.
ايسوسيئيشن مطالبو ڪيو آهي ته وفاقي حڪومت پيٽرول جي قيمتن جي روزاني جي بنياد تي مقرري جو فارمولو ختم ڪري، جڏهن ته گذريل 8 سالن کان پيٽرول پمپ مالڪن جي مارجن ۾ واڌ نه ٿيڻ تي به ڳڻتي جو اظهار ڪيو آهي.
پيٽروليم ايسوسي ايشن خيبرپختونخواهه جي جنرل سيڪريٽري بهزاد الرحمان چيو ته مطالبن جي مڃتا تائين پيٽرول پمپن جي بندش ۽ احتجاج جاري رهندو.
هن حڪومت کان فوري ڳالهين ۽ مسئلن جي حل جو مطالبو ڪندي چيو ته پيٽرول پمپن جي بندش سبب شهرين کي پيٽرول حاصل ڪرڻ ۾ سخت پريشانين ۽ ڏکيائين کي منهن ڏيڻو پئجي رهيو آهي.
