واشنگٽن (م ڊ) آمريڪي صدر ڊونلڊ ٽرمپ خبردار ڪيو آهي ته جيڪڏهن ايران سان جاري ڳالهيون ڪنهن حتمي معاهدي تائين نه پهتيون ته آمريڪا آبنائے هرمز تي ٽول (فيس) لاڳو ڪرڻ تي غور ڪري سگهي ٿو.
صدر ٽرمپ پنهنجي سوشل ميڊيا پليٽ فارم ٽرٿ سوشل تي جاري ڪيل بيان ۾ چيو آهي ته في الحال آبنائے هرمز تي ڪو به محصول نه لڳايو ويندو پر جيڪڏهن ايران سان معاهدو مڪمل نه ٿيو ته آمريڪا هن اهم آبي گذرگاهه تي پنهنجي خدمتن جي فيس وٺڻ جو حق محفوظ رکي ٿو.
پنهنجي بيان ۾ ٽرمپ دعويٰ ڪئي ته آمريڪا ڏهاڪن کان وچ اوڀر جي ملڪن لاءِ ”محافظ“ يا ”نگهبان فرشتي“ جو ڪردار ادا ڪري رهيو آهي ۽ خطي ۾ امن ۽ سلامتي لاءِ وڏيون قيمتون برداشت ڪري رهيو آهي.
هن چيو ته جيڪڏهن اهو معاهدو ناڪام ٿيو ته آمريڪا آبنائے هرمز مان گذرندڙ سامونڊي واپار تي اڳوڻن، موجوده ۽ مستقبل جي خرچن کي پورو ڪرڻ لاءِ ٽيرف يا ٽول لاڳو ڪرڻ تي غور ڪري سگهي ٿو.
آبنائے هرمز دنيا جي اهم سامونڊي لنگهن مان هڪ آهي، جنهن مان دنيا جي تيل جي واپار جو وڏو حصو گذرندو آهي. فارس نار کي عربي سمنڊ سان ڳنڍڻ واري هن لنگهه جي اهميت عالمي توانائي مارڪيٽن لاءِ تمام گهڻي آهي.
معاشي ماهرن جو چوڻ آهي ته جيڪڏهن مستقبل ۾ اهڙو ڪو قدم کنيو ويو ته ان سان تيل جي عالمي قيمتن، سامونڊي واپار ۽ عالمي معيشت تي خاص اثر پئجي سگهن ٿا.
سياسي تجزيه نگارن موجب ٽرمپ جو بيان ايران سان جاري سفارتي ڳالهين تي دٻاءُ وڌائڻ جي ڪوشش ٿي سگهي ٿو ته جيئن ٻئي ڌريون جلد ڪنهن حتمي معاهدي تي پهچي سگهن.
اهو بيان هڪ اهڙي وقت ۾ سامهون آيو آهي جڏهن آمريڪا ۽ ايران وچ ۾ تازو ٿيل مفاهمتي معاهدي تي عمل درآمد لاءِ وڌيڪ ڳالهيون جاري آهن ۽ عالمي برادري انهن ڳالهين جي نتيجن کي ويجهي کان مانيٽر ڪري رهي آهي.
