فيفا ورلڊ ڪپ 2026 ۾ نمايان ڪردار ادا ڪندڙ ڏکڻ آفريڪا جو فٽبالر جيڊن ايڊمز 25 سالن جي عمر ۾ لاڏاڻو ڪري ويو.
پرڏيهي ميڊيا موجب ڏکڻ آفريقي ڪلب مميلوڊي سنڊائونز جي مڊ فيلڊر جيڊن ايڊمز ڪجهه هفتا اڳ فيفا ورلڊ ڪپ 2026ع ۾ قومي ٽيم جي نمائندگي ڪندي پنهنجي انٽرنيشنل ڪيريئر جو سڀ کان وڏو سنگ ميل عبور ڪيو هو.
جيڊن ايڊمز 2026 ورلڊ ڪپ ۾ ڏکڻ آفريڪا جي تاريخي مهم ۾ اهم ڪردار ادا ڪيو ۽ گروپ اسٽيج جي سڀني ميچن ۾ کيڏيو. ڏکڻ آفريڪي ٽيم پهريون ڀيرو فيفا ورلڊ ڪپ جي ناڪ آئوٽ اسٽيج تائين پهچڻ ۾ ڪامياب ٿي وئي.
ڏکڻ آفريڪا جي راندين، آرٽس ۽ ثقافت واري وزير گيٽن ميڪنزي پنهنجي تعزيتي بيان ۾ چيو ته جيڊن ايڊمز جي لاڏاڻي جي خبر انتهائي افسوسناڪ آهي. سندس چوڻ هو ته ڏکڻ آفريڪي فٽبال پنهنجو هڪ روشن نوجوان رانديگر وڃائي ڇڏيو آهي ۽ پوري قوم سندس خاندان، ساٿي رانديگرن ۽ مداحن جي ڏک ۾ برابر جي شريڪ آهي.
هن چيو ته جيڊن ايڊمز جي موت جو ڪارڻ اڃا سامهون نه اچي سگهيو آهي، ان ڪري ميڊيا ۽ عوام کي گذارش آهي ته هن ڏکئي وقت ۾ فڪشن کان پاسو ڪن ۽ خاندان ۽ ڪلب جي نجي زندگي جو احترام ڪن.
