ڪراچي:
بفرزون واري علائقي ۾ شاپنگ سينٽر ۾ باهه لڳڻ جي نتيجي ۾ ڪيتريون ئي موٽرسائيڪلون سڙي رک ٿي ويون.
شروعاتي اطلاعن موجب بفرزون ۾ آرام شاپنگ سينٽر جي ميزانين فلور تي باهه لڳي وئي، جنهن سبب شاپنگ سينٽر جي ڪوريڊور ۾ موجود 2 دڪان ۽ اتي بيٺل ڪيتريون ئي موٽرسائيڪلون سڙي رک ٿي ويون.
فائر برگيڊ عملدارن موجب باهه تي ضابطو آڻڻ لاءِ 2 فائر ٽينڊر ۽ واٽر باؤزر موقعي تي پهچي ويا ۽ بروقت ڪارروائي ڪري باهه کي وڌيڪ پکڙجڻ کان روڪيو ويو.
اختيارين جو چوڻ آهي ته باهه لڳڻ جي نتيجي ۾ 7 کان 8 موٽرسائيڪلون سڙي رک ٿي ويون.
ريسڪيو عملدارن موجب شهرين پنهنجون موٽرسائيڪلون روڊ تي پارڪ ڪيون هيون جنهن کي باهه لڳي وئي. رضاڪارن به آپريشن دوران لوهي جال ٽوڙي هڪ ڇوڪريءَ کي بچائي ورتو.
فائر برگيڊ عملدارن جو چوڻ آهي ته باهه تي ضابطو آندو ويو آهي جڏهن ته کولنگ جو عمل جاري آهي. اختيارين موجب باهه لڳڻ سبب ڪو به جاني نقصان نه ٿيو آهي ۽ صورتحال مڪمل طور تي ڪنٽرول هيٺ آهي. باهه لڳڻ جا سبب معلوم ڪرڻ لاءِ جاچ شروع ڪئي وئي آهي.
