ڪراچي:
نوجوان پٽ کي قتل ڪندڙ پيءُ ڏوهه قبولي ورتو آهي.
بلديا ٽائون جي علائقي گلشن غازي ۾ گهر مان نوجوان جو تشدد ٿيل لاش هٿ اچڻ واري ڪيس ۾ اڳڀرائي ٿي آهي، جنهن موجب نوجوان پٽ جي قتل ۾ پيءُ ملوث هو، جنهن کي پوليس گرفتار ڪري ورتو آهي.
پوليس موجب پيءُ پنهنجي 17 ورهين جي پٽ کي بيدردي سان تشدد ڪري قتل ڪرڻ جو اعتراف ڪيو آهي. فوت ٿيل نوجوان 6-7 ڏينهن کان گهر مان غائب هو، سندس گهرواري کيس ڳولي رهي هئي. ڪالهه جڏهن نوجوان گهر آيو ته پيءُ کيس بستري سان ٻڌي سخت تشدد ڪيو. نوجوان کي سندس پيءُ هٿ ٻڌي لٺن ۽ ٻين شين سان تشدد ڪيو.
پنهنجي بيان ۾ پيءُ چيو ته پٽ منشيات جو عادي هو ۽ غير قانوني سرگرمين ۾ به ملوث هو.
پوليس موجب واقعو ڪالهه شام پيش آيو، جنهن بعد نوجوان کي خاموشي سان دفنائڻ جون ڪوششون جاري آهن. اطلاع ملڻ تي پوليس پهچي لاش تحويل ۾ وٺي اسپتال منتقل ڪيو.
فوتي نوجوان 4 ڀائرن ۾ وڏو هو، جڏهن ته سندس والد رڪشا ڊرائيور آهي. گرفتار جوابدار جو تعلق صوابي سان آهي، جنهن خلاف پٽ جي قتل جو ڪيس داخل ڪيو ويو آهي.
