ڪراچي پورٽ 8 سالن کانپوءِ 2 هزار جهازن جي آمد جو سنگ ميل عبور ڪري ورتو آهي.
سامونڊي معاملن واري وفاقي وزير جنيد انور چوڌري ڪراچي پورٽ جي هڪ ٻي وڏي ڪاميابي جو اعلان ڪندي چيو آهي ته ڪراچي پورٽ 8 سالن کانپوءِ 2000 جهازن جي آمد جو سنگ ميل عبور ڪري ورتو آهي.
هن چيو ته ڪراچي پورٽ تي هلندڙ سال 2 هزار 3 جهاز لنگر انداز ٿيا، جيڪو بندرگاهه جي سرگرمين ۾ نمايان واڌ جي عڪاسي ڪري ٿو.
جنيد انور چوڌري چيو ته ڪراچي پورٽ تي جهازن جي آمد ۾ گذريل سال جي ڀيٽ ۾ 7.5 سيڪڙو اضافو رڪارڊ ڪيو ويو آهي. هن چيو ته بندرگاهه تي ايندڙ جهازن جو ڪل ٽيننيج 84.4 ملين ٽن کان وڌي ويو آهي، جڏهن ته مجموعي رجسٽرڊ ٽننيج ۾ به 3 سيڪڙو اضافو رڪارڊ ڪيو ويو آهي.
سامونڊي معاملن واري وفاقي وزير چيو ته سامونڊي واپار ۾ اهو اضافو ملڪي معيشت لاءِ مثبت اشارو آهي ۽ اهو تجارتي سرگرمين جي فروغ جي عڪاسي ڪري ٿو.
هن ڪراچي پورٽ جي ڪارڪردگي کي بحري شعبي جي لاءِ اهم پيش رفت قرار ڏنو.
ٻئي طرف ڪراچي پورٽ ٽرسٽ جي چيئرمين شاهد احد ان ڪاميابي کي شپنگ سرگرمين ۾ بهتري ۽ آپريشنل ڪارڪردگي جو نتيجو قرار ڏنو. هن چيو ته بهتر انتظامن جي قدمن ۽ پورٽ آپريشنز ۾ بهتري سبب ڪراچي پورٽ اها تاريخي ڪاميابي حاصل ڪرڻ ۾ ڪامياب ٿي آهي.
شاهد احد وڌيڪ چيو ته ڪراچي پورٽ 1887ع ۾ قائم ٿيو، جيڪو اڄ به ملڪ جو اهم ترين سامونڊي واپاري گيٽ وي آهي ۽ قومي ۽ بين الاقوامي واپاري سرگرمين ۾ مرڪزي ڪردار ادا ڪري ٿو.
