لاهور:
پنجاب پوليس کي ايندڙ مالي سال جي 330 ارب رپين جي گهربل بجيٽ بدران 239 ارب رپيا ملڻ جو امڪان آهي.
پنجاب پوليس ايندڙ مالي سال لاءِ پنجاب حڪومت کان 330 ارب رپين جي فنڊز جي درخواست ڪئي هئي پر ذريعن موجب نئين مالي سال ۾ پوليس کاتي کي 90 ارب رپيا گهربل بجيٽ کان گهٽ فنڊ ملڻ جو امڪان آهي.
ذريعن جو چوڻ آهي ته پنجاب حڪومت ايندڙ مالي سال لاءِ پنجاب پوليس کي 239 ارب رپين جي بجيٽ فراهم ڪندي.
پنجاب پوليس لاءِ مختص ڪيل بجيٽ جو 80 سيڪڙو پگهارن ۽ ٻين هلندڙ خرچن تي خرچ ڪيو ويندو. ان کان اڳ پوليس کاتي مختلف شعبن لاءِ اضافي فنڊن جي ضرورت جو اظهار ڪيو هو پر بجيٽ تجويزون موجود وسيلن کي نظر ۾ رکندي تيار ڪيون ويون آهن.
ايندڙ مالي سال جي بجيٽ ۾ پنجاب پوليس جي نئين قائم ٿيل ڊجيٽل ونگ لاءِ 9 ارب رپيا مختص ڪرڻ جي تجويز ڏني وئي آهي، جڏهن ته ترقياتي منصوبن لاءِ 6 ارب رپيا رکيا ويا آهن. ذريعن موجب ترقياتي بجيٽ ۾ رڳو هلندڙ ترقياتي اسڪيمن کي شامل ڪيو ويو آهي.
ذريعن جو چوڻ آهي ته ڪيتريون ئي نيون ترقياتي اسڪيمون هڪ سال کان التوا جو شڪار آهن. نون پوليس اسٽيشنن جي اڏاوت، ٽريننگ سينٽرز جو قيام ۽ ٻيون نيون ترقياتي رٿائون ايندڙ مالي سال جي بجيٽ ۾ شامل نه ڪيون ويون، جنهن سبب انهن منصوبن تي عمل ۾ دير ٿيڻ جو خدشو آهي.
پنجاب پوليس به فنڊن جو وڏو حصو تيل ۽ ٻارڻ جي خرچن لاءِ طلب ڪيو.
ذريعن موجب هلندڙ مالي سال ۾ پنجاب حڪومت پوليس لاءِ 230 ارب رپين جي بجيٽ جاري ڪئي هئي پر تيل جي اگهن ۾ واڌ سبب اها بجيٽ ڪافي نه ثابت ٿي آهي. ان کان پوءِ پنجاب حڪومت پنجاب پوليس کي 45 ارب رپين جا اضافي فنڊ پڻ سپليمنٽري گرانٽ طور ڏنا.
