گهرو وزير گڏيل قومن جي سيڪريٽري جنرل سان ملاقات ڪئي، جنهن ۾ علائقائي ۽ عالمي امن تي خيالن جي ڏي وٺ ڪئي وئي.
ايڪسپريس نيوز موجب وفاقي گهرو وزير محسن نقوي نيويارڪ ۾ گڏيل قومن جي هيڊ ڪوارٽرز ۾ سيڪريٽري جنرل انتونيو گوتريس سان ملاقات ڪئي، جنهن ۾ علائقائي صورتحال ۽ مختلف عالمي معاملن تي تفصيلي ڳالهه ٻولهه ڪئي وئي.
ملاقات دوران اولهه ايشيا ۾ جاري ڇڪتاڻ جي خاتمي لاءِ پاڪستان جي ثالثي جي ڪوششن تي به خيالن جي ڏي وٺ ڪئي وئي، جڏهن ته گڏيل قومن جي امن مشن خاص طور تي انهن ۾ پاڪستان جي مسلسل خدمتن تي به خيالن جي ڏي وٺ ڪئي وئي.
ان موقعي تي محسن نقوي چيو ته چئلينجن باوجود پاڪستان علائقائي امن ۽ استحڪام کي هٿي وٺرائڻ ۽ انساني جانين جي تحفظ لاءِ ذميواري جو مظاهرو ڪيو جڏهن ته فيلڊ مارشل ۽ وزيراعظم شهباز شريف ان حوالي سان اهم ڪردار ادا ڪيو.
هن ان ڳالهه تي به زور ڏنو ته هڪ حقيقي مينڊيٽ ۽ گهربل وسيلن جي فراهمي امن مشن جي ڪاميابي لاءِ ضروري آهي.
گڏيل قومن جي سيڪريٽري جنرل انتونيو گوتريس عالمي امن ۽ سلامتي جي قيام لاءِ پاڪستان جي مسلسل خدمتن ۽ گڏيل قومن جي امن مشنز ۾ ڊگهي مدي واري تعاون تي پاڪستان جا ٿورا مڃيا.
