واشنگٽن: يو ايس سينٽرل ڪمانڊ اعلان ڪيو آهي ته هن 12 جولاءِ تي ايران جي مختلف فوجي هدفن خلاف هڪ ٻي وڏي هوائي ڪارروائي دوران جديد ۽ انتهائي درست ٽارگيٽ ڪلنگ هٿيارن سان درجنين هنڌن کي نشانو بڻايو.
CENTCOM پاران جاري ڪيل بيان موجب حملن ۾ ايران جي ايئر ڊفينس سسٽم، ساحلي راڊار تنصيب، ميزائل ۽ ڊرون جي صلاحيت، ننڍي فوجي ٻيڙين ۽ ٻين فوجي هدفن کي نشانو بڻايو ويو.
بيان ۾ چيو ويو آهي ته آپريشن ۾ آمريڪي جنگي جهازن، بحري جنگي جهازن، فضائي ڊرونز ۽ بحري ڊرونز کي ايراني فوجي صلاحيتن کي ڪمزور ڪرڻ لاءِ استعمال ڪيو ويو.
آمريڪي سينٽرل ڪمانڊ موجب آپريشن جو مقصد ايران جي آبنائي هرمز مان گذرندڙ بين الاقوامي واپاري جهازن کي خطرو بڻائڻ جي صلاحيت کي محدود ڪرڻ آهي. آبنائے هرمز دنيا جي اهم ترين شپنگ لين مان هڪ آهي، جنهن ذريعي وڏي مقدار ۾ تيل ۽ ٻيو تجارتي سامان عالمي سطح تي منتقل ڪيو ويندو آهي.
Centcom وڌيڪ چيو ته آمريڪي فوجون مڪمل طور تي تيار آهن بين الاقوامي واپاري جهازن جي محفوظ گذرڻ ۽ علائقي ۾ نيويگيشن جي آزادي جي حفاظت لاءِ.
آمريڪي فوج پنهنجي بيان ۾ ايران تي خطي ۾ مسلسل جارحيت، ڏاڍ ۽ خطرن جو به الزام لڳايو ۽ چيو ته اهي سرگرميون عالمي سامونڊي واپار ۽ علائقائي سلامتي لاءِ خطرو آهن.
ٻئي طرف، آمريڪي دعوائن تي ايران طرفان فوري طور تي ڪوبه ردعمل نه آيو آهي. جڏهن ته، ٻنهي ملڪن جي وچ ۾ وڌندڙ فوجي ڇڪتاڻ تازو وقتن ۾ وچ اوڀر ۾ سيڪيورٽي خدشات کي وڌايو آهي.
تجزيه نگارن موجب جيڪڏهن ٻنهي ملڪن وچ ۾ ڇڪتاڻ برقرار رهي ته ان جا اثر عالمي تيل مارڪيٽ، سامونڊي واپار ۽ خطي جي امن ۽ استحڪام تي پئجي سگهن ٿا.
