مظفرآباد:
آزاد ڪشمير جي چونڊ نتيجن تي پاڪستان پيپلز پارٽي ۽ مسلم ليگ ن ۾ ڇڪتاڻ ٿي وئي، بلاول ڀٽو زرداري آزاد ڪشمير جي چونڊ نتيجن کي تسليم ڪرڻ کان انڪار ڪري ڇڏيو.
مظفر آباد ۾ ورڪرز ڪنوينشن کي خطاب ڪندي پ پ چيئرمين بلاول ڀٽو زرداري چيو ته چوڌري ياسين جي تڪ ۾ ڌانڌلي جا نتيجا ڇو قبول ڪيون؟ 30 پولنگ اسٽيشنن تي قبضي ۽ ٽمپرنگ جا وڊيو ثبوت موجود آهن.
هن چيو ته انهن 30 پولنگ اسٽيشنن تي 90 سيڪڙو ٽرن آئوٽ آهي، چوڌري ياسين جي تڪ ۾ ٻيهر پولنگ ڪرائي وڃي.
هن چيو ته پيپلز پارٽي جو مقابلو ان پارٽي سان آهي جيڪا نسل در نسل ڌانڌلي جي پيداوار آهي، جيڪڏهن سياسي ميدان ۾ شڪست ملي ته مان ان کي قبول ڪرڻ لاءِ تيار آهيان پر چوري جو نتيجو قبول نه ڪندس.
بلاول ڀٽو زرداري چيو ته کير جو کير ۽ پاڻي جو پاڻي ڪرڻ لاءِ سچائي ۽ مفاهمتي ڪميشن ٺهڻ گهرجي، ڪشميري عوام جي ووٽ تي ڪنهن کي به ڦرلٽ ڪرڻ نه ڏينداسين، مان توهان کي يقين ڏيان ٿو ته انهن کان هر چوري ۽ کسيل سيٽ واپس ڪرائي ويندي.
پاڪستان پيپلز پارٽي جي چيئرمين وڌيڪ چيو ته مان ڪشمير جي عوام کي مالڪي جو حق ڏيارڻ چاهيان ٿو.
