ايراني پرڏيهي وزير عباس عراقچي چيو آهي ته آبنائے هرمز جي بندش جو ذميوار ايران ناهي پر اهي عنصر آهن جيڪي خطي ۾ ڇڪتاڻ پيدا ڪن ٿا، جڏهن ته سامونڊي لنگهه رڳو انهن ملڪن ۽ قوتن لاءِ بند ڪيو ويو آهي جيڪي ايران خلاف جنگ ۾ ملوث آهن.
پنهنجي تازي بيان ۾ ايراني پرڏيهي وزير چيو ته ايران سفارتڪاري ۽ ڳالهين جو حامي آهي پر آمريڪا سنجيدگي ۽ باهمي احترام جو مظاهرو ڪرڻ تي ئي ڳالهيون ممڪن آهن. هن واضح ڪيو ته ايران ڪنهن به دٻاءُ، خطري يا فوجي ڪارروائي کي رد ڪري ٿو.
عباس عراقچي چيو ته ايران ڪيترن ئي سالن کان آمريڪي پابندين کي منهن ڏئي رهيو آهي ۽ 2015ع جي ايٽمي معاهدي جي مڪمل پاسداري ڪري رهيو آهي پر آمريڪا تي اڃا به اعتبار نٿو ڪري سگهجي.
هن چيو ته ايران جو ايٽمي پروگرام مڪمل طور پرامن مقصدن لاءِ آهي ۽ تهران ڪڏهن به ايٽمي هٿيار ٺاهڻ نه چاهيندو هو. سندس چوڻ هو ته ڳالهين جي ايندڙ مرحلي ۾ ايٽمي افزودگي بابت معاملن تي غور ڪيو ويندو.
ايراني پرڏيهي وزير چيو ته جيڪو مقصد فوجي آپريشن ذريعي حاصل نٿو ڪري سگهجي، اهو ڳالهين ذريعي حاصل نٿو ڪري سگهجي. هن چيو ته ايران عزت ۽ برابري جي بنياد تي ڳالهيون چاهي ٿو.
هن وڌيڪ چيو ته ايران جنگبندي برقرار رکڻ ۽ سفارتڪاري کي موقعو ڏيڻ جي ڪوشش ڪري رهيو آهي، جڏهن ته موجوده ڳالهين ۾ اعتماد جي کوٽ آهي.
پاڪستان جي ثالثي جي ڪوششن جي حوالي سان عباس عراقچي جو چوڻ هو ته اسلام آباد جون جاري مصالحت جون ڪوششون اڃا تائين ناڪام نه ٿيون آهن، پر يقينن مشڪلاتن کي منهن ڏئي رهيا آهن.
هن اشارو ڏنو ته هڪ ملڪ سڌي طرح جنگ ۾ ملوث هو، پر ان جو نالو نه ورتو.
ايراني پرڏيهي وزير اهو به واضح ڪيو ته آبنائي هرمز سڀني تجارتي جهازن لاءِ کليل آهي سواءِ انهن ملڪن جي جيڪي ايران خلاف فوجي ڪارروائي ۾ حصو وٺن ٿا.
