اي اين ايف سڄي ملڪ ۾ ڪارروايون ڪندي 4 ڪروڙ رپين کان وڌيڪ جي منشيات هٿ ڪري ورتي.
ترجمان موجب اينٽي نارڪوٽڪس فورس ملڪ جي مختلف شهرن ۾ منشيات فروشن خلاف ڪريڪ ڊائون ڪندي 7 ڪاررواين دوران 5 جوابدارن کي گرفتار ڪري ورتو.
انهن ڪاررواين دوران 44.4 ملين رپين کان وڌيڪ ماليت جي 316.724 ڪلو گرام منشيات هٿ ڪئي وئي، جڏهن ته سمورن خلاف اينٽي نارڪوٽڪس ايڪٽ 1997ع تحت ڪيس داخل ڪري جاچ شروع ڪئي وئي آهي.
اي اين ايف موجب سيالڪوٽ ايئرپورٽ تي سعودي عرب ويندڙ مسافر جي سامان ۾ 7 احرام ۾ جذب ٿيل 12.160 ڪلو برف هٿ ڪئي وئي، جڏهن ته سعودي عرب موڪليل پارسل ۾ ڪپڙن ۾ جذب ٿيل 6.560 ڪلو برف فيصل آباد ۾ ڪوريئر آفيس مان هٿ ڪري هڪ جوابدار کي گرفتار ڪيو ويو.
هوڏانهن تونسه ٽول پلازه وٽ مسافر بس مان 24 ڪلو چرس هٿ ڪري هڪ جوابدار کي گرفتار ڪيو ويو، جڏهن ته شڪارپور روڊ سکر ويجهو موٽرسائيڪل سوار جوابدار جي قبضي مان 10 ڪلو چرس هٿ ڪئي وئي. اهڙي طرح پشاور جي رنگ روڊ تي سي اين جي اسٽيشن ڀرسان هڪ گاڏي مان 3.450 ڪلوگرام برف هٿ ڪري هڪ جوابدار کي گرفتار ڪيو ويو.
ان کان علاوه لاهور جي واهگا ڳوٺ ۾ ڊرون مان 554 گرام هيروئن هٿ ڪئي وئي، جڏهن ته دلبدين ويجهو ڪارروائي دوران 260 ڪلو چرس هٿ ڪئي وئي.
اي اين ايف موجب سموري ڪارروائي کانپوءِ اينٽي نارڪوٽڪس ايڪٽ 1997 تحت ڪيس داخل ڪري وڌيڪ جاچ شروع ڪئي وئي آهي.
