اسلام آباد هاءِ ڪورٽ؛ منشيات ڪيس جي ٻڌڻي دوران انمول عرف پنڪي جو به ذڪر ٿيو

اسلام آباد جي تعليمي ادارن مان منشيات جي خاتمي بابت ڪيس جي ٻڌڻي دوران منشيات ڪيس ۾ گرفتار جوابدار انمول گلابي جي ڪيس جي ٻڌڻي سنڌ هاءِ ڪورٽ ۾ ٿي. عدالت يونيورسٽين ۾ منشيات خلاف قدمن بابت ايڇ اي سي کان رپورٽ طلب ڪري ورتي. عدالت تعليم واري وزارت کي هدايت ڪئي ته منشيات جي خاتمي بابت وفاقي حڪومت جا ضابطا منظور ڪيا وڃن ۽ ايڇ اي سي کي نگران ڪميٽي ۾ اي اين ايف ۽ پوليس کي شامل ڪرڻ جو حڪم ڏنو. وڪيل درخواستگذار ڪاشف ملڪ انمول پنڪي ڪيس جو حوالو ڏيندي چيو ته ڪراچي ۾ ڪيس هلي رهيو آهي، جنهن ۾ رائيڊر ۽ ڊليوري بوائز به ملوث آهن. جسٽس راجا انعام امين رمارڪس ڏيندي چيو ته مان پهرين ڏينهن کان چئي رهيو آهيان ته منشيات رائيڊرز ۽ ڊليوري بوائز ذريعي منتقل ٿيندي آهي. ايڇ اي سي اختيارين موجب اسان تعليمي ادارن ۾ ڊليوري بوائز ۽ رائيڊرز لاءِ جڳهه مختص ڪئي آهي، جيڪو به رائيڊر يا ڊليوري بواءِ اچي ٿو ان کي پهريان چيڪ ڪيو ويندو آهي. اسلام آباد هاءِ ڪورٽ حڪم ڏنو ته تعليمي ادارن ۾ باقاعده مانيٽرنگ ڪئي وڃي ۽ رپورٽ پيش ڪئي وڃي، ضلعي انتظاميا به منشيات ۽ مانيٽرنگ خلاف قدم کڻي. وڪيل ڪاشف ملڪ دليل ڏيندي چيو ته يونيورسٽي ۽ ڪاليج کانپوءِ هاڻي اسڪولن ۾ منشيات عام ٿي وئي آهي، هاڻي ستين ۽ اٺين ڪلاس جا شاگرد به منشيات استعمال ڪري رهيا آهن. وڪيل رفيع ايڊووڪيٽ چيو ته اسلام آباد جي ننڍن دڪانن تي به منشيات عام آهي. عدالت اسلام آباد پوليس کي منشيات جي خلاف نگراني ۽ قدم کڻڻ جو به حڪم ڏنو. ٻڌڻي دوران جسٽس راجا انعام امين منهاس ڊي ايس پي ليگل ساجد چيما جو تذڪرو ڪندي رمارڪس ڏنا ته ڪٿي آهي ڊي ايس پي ليگل ساجد چيما ان ڪيس ۾ سٺو ڪم ڪري رهيو آهي. نئين مقرر ٿيل انسپيڪٽر ليگل جواب ڏنو ته ساجد چيما هاڻي ڊي ايس پي هيڊڪوارٽر آهي. جسٽس راجا انعام امين رمارڪس ڏنا ته سٺو ڪم ڪندڙ آفيسر کي بدلي ڪيو ويندو آهي. عدالت ميڊيا کي به هدايت ڪئي ته پرائم ٽائم ۾ منشيات خلاف آگاهي مهم هلائي وڃي. عدالت پيمرا کان ميڊيا تي منشيات خلاف آگاهي مهم بابت رپورٽ طلب ڪري ورتي. عدالت تعليمي ادارن ۾ منشيات جي خاتمي بابت ايڇ اي سي، پوليس ۽ ضلعي انتظاميا کان مانيٽرنگ رپورٽ طلب ڪري ورتي. ايڇ اي سي، گهرو وزارت جا عملدار، ڊپٽي اٽارني جنرل فيصل عرفان، اي اين ايف پراسيڪيوٽر رانا ذوالفقار ۽ پيمرا جو وڪيل عدالت ۾ پيش ٿيا. ڪيس جي ٻڌڻي جون جي آخري هفتي تائين ملتوي ڪئي وئي.



Source link