پشاور:
عدالت حڪم ڏنو ته افغانستان ۾ آمريڪي فوج سان گڏ ڪم ڪندڙ افغان شهري کي ملڪ بدر نه ڪيو وڃي.
پشاور هاءِ ڪورٽ جي جسٽس وقار احمد ۽ جسٽس بابر ستار تي ٻڌل 2 رڪني بينچ پاڪستان ۾ رهندڙ افغان شهري مسيح الله جي ملڪ بدر ڪرڻ خلاف داخل درخواست تي ٻڌڻي ڪئي.
عدالت درخواستگذار کي افغانستان نه موڪلڻ جو حڪم ڏيندي گهرو وزارت ۽ ٻين ڌرين کي نوٽيس جاري ڪندي ايندڙ ٻڌڻي تائين جواب طلب ڪري ورتو.
عدالت حڪم ڏنو ته درخواستگذار کي ايندڙ ٻڌڻي تائين افغانستان نه موڪليو وڃي، جڏهن ته ڌرين کي 29 جون تائين جواب طلب ڪيو ويو آهي.
درخواستگذار جي وڪيل ملڪ شهباز خان ايڊووڪيٽ عدالت کي ٻڌايو ته درخواستگذار افغان شهري آهي ۽ هن وقت پاڪستان ۾ رهي ٿو. هن چيو ته درخواستگذار افغانستان ۾ آمريڪي فوجن سان گڏ ڪم ڪيو هو ۽ طالبان جي حڪومت قائم ٿيڻ کانپوءِ پنهنجي جان بچائڻ لاءِ پاڪستان آيو هو.
درخواستگذار جي وڪيل موقف اختيار ڪيو ته درخواستگذار کي افغانستان ۾ جان جو خطرو آهي. هن ڪينيڊين سفارتخاني ۾ پناهه لاءِ به درخواست ڏني آهي، جنهن تي هن وقت ڪارروائي ٿي رهي آهي. هن عدالت کي استدعا ڪئي ته درخواستگذار کي هن وقت افغانستان نه موڪليو وڃي.
