آمريڪي پرڏيهي وزير مارڪو روبيو چيو آهي ته آبنائي هرمز جي صورتحال کي حل ڪرڻ لاءِ گذريل 48 ڪلاڪن ۾ اهم اڳڀرائي ٿي آهي ۽ ايران سان امڪاني معاهدي بابت وڌيڪ خبرون اڄ اچي سگهن ٿيون.
آمريڪي پرڏيهي وزير مارڪو روبيو اهڙو بيان نئين دهلي ۾ پنهنجي ڀارتي هم منصب جي شنڪر سان گڏيل پريس ڪانفرنس دوران ڪيو. مارڪو روبيو هن وقت ڀارت ۾ چار ڏينهن جي دوري تي آهي.
صحافين سان ڳالهائيندي مارڪو روبيو چيو ته آمريڪا ۽ ايران وچ ۾ مفاهمت جي هڪ امڪاني ياداشت (ايم او يو) تي ڳالهيون جاري آهن، جنهن جو مقصد جنگ ختم ڪرڻ ۽ آبنائي هرمز ۾ ڇڪتاڻ کي گهٽائڻ آهي. هن چيو ته اڃا وڌيڪ ڪم ڪرڻو آهي پر ڳالهين ۾ مثبت اڳڀرائي ٿي آهي.
آمريڪي پرڏيهي وزير ايران تي سخت تنقيد ڪندي چيو ته ايران دنيا ۾ دهشتگردي جو سڀ کان وڏو اسپانسر آهي.
هن چيو ته ايران عوام جي ڀلائي، روڊن جي تعمير ۽ ترقي تي سرمايو خرچ ڪرڻ بدران حزب الله ۽ حماس جهڙن گروپن جي حمايت تي خرچ ڪري ٿو.
مارڪو روبيو الزام هنيو ته ايران بين الاقوامي واٽر ويز ۾ بارودي سرنگون رکي رهيو آهي ۽ شهري جهازن کي يرغمال بڻائي رهيو آهي، عالمي واپار ۽ بحري سلامتي کي خطرو آهي.
هن وڌيڪ چيو ته آمريڪا جو موقف واضح آهي ته ايران کي ڪڏهن به ايٽمي هٿيارن جي حصول جي اجازت نه ڏني ويندي. سندس چوڻ هو ته ان حوالي سان جاري ڳالهين ۾ ايران جي رضامندي ۽ مڪمل عملدرآمد ضروري هوندو.
