ادارن خلاف مبينا اعتراض وارين بيانن جي معاملي تي باني پي ٽي آءِ جي ڀيڻ نورين نيازي پنهنجي وڪيل ذريعي قومي سائبر ڪرائم انويسٽيگيشن ايجنسي (اين سي سي آءِ اي) جي نوٽيس تي لکت ۾ جواب جمع ڪرائي ڇڏيو آهي.
نورين نيازي پنهنجي جواب ۾ نوٽيس جي قانوني حيثيت تي سوال اٿاريا ۽ چيو ته نوٽيس ۾ الزام ۽ لاڳاپيل قانوني شقون واضح ناهن. هنن NCCIA کان پڻ مطالبو ڪيو آهي ته شڪايت ۽ الزامن جا مڪمل تفصيل فراهم ڪيا وڃن.
لکت واري جواب ۾ نورين نيازي الزامن کي بي بنياد قرار ڏيندي رد ڪندي چيو ته هوءَ قانون جي دائري ۾ رهي مڪمل سهڪار ڪندي پر پنهنجا آئيني ۽ قانوني حق محفوظ رکي ٿي.
ٻئي طرف نورين نيازي جي وڪيل فيصل ملڪ ايڊووڪيٽ اين سي سي آءِ اي آفيس ٻاهران ميڊيا سان ڳالهائيندي چيو ته نوٽيس ۾ پتو به غلط لکيو ويو آهي، اها سوشل ميڊيا ذريعي سامهون آئي. هن چيو ته جيڪڏهن ڪا شڪايت آهي ته ان جي ڪاپي فراهم ڪئي وڃي ۽ واضح ڪيو وڃي ته نورين نيازي کي ڪهڙي قانون تحت طلب ڪيو ويو آهي.
وڪيل موجب نورين نيازي شروعاتي جواب جمع ڪرائي ڇڏيو آهي ۽ وڌيڪ تفصيل لاءِ 4 هفتن جو وقت گهريو ويو آهي. هن چيو ته نورين نيازي هن وقت پرڏيهه ۾ آهي، ان ڪري فوري طور پيش ٿيڻ ممڪن ناهي.
ايڊووڪيٽ فيصل ملڪ چيو ته نورين نيازي سمورن رياستي ادارن جو احترام ڪري ٿي ۽ هڪ محب وطن پاڪستاني آهي، ان سان قانون موجب علاج ٿيڻ گهرجي. نورين نيازي جي ڀاءُ سڄي زندگي ملڪ جو نالو روشن ڪرڻ جي ڪوشش ڪئي.
