ڪراچي:
واپاري برادري ايندڙ وفاقي بجيٽ ۾ نوان ٽيڪس لڳائڻ، سپر ٽيڪس ختم ڪرڻ ۽ گئس ۽ بجلي جا اگهه گهٽائڻ جي تجويز ڏني آهي.
فيڊرل بي ايريا ٽريڊ اينڊ انڊسٽري جي صدر شيخ تحسين مطالبو ڪيو آهي ته وفاقي بجيٽ اقتصاديات، واپاري برادري ۽ صنعتي شعبن جي نمائندن جي نگرانيءَ ۾ تيار ڪئي وڃي ۽ بجيٽ جي عمل ۾ واپاري ۽ صنعتڪار حلقن جي راءِ کي شامل ڪيو وڃي.
هن چيو ته حڪومت اقتصادي، صنعتي ۽ تجارتي ماهرن تي مشتمل هڪ خاص ٽيم ٺاهي ۽ بجيٽ تيار ڪري ته جيئن معيشت ۽ صنعت کي درپيش مسئلن کي موثر طريقي سان حل ڪري سگهجي.
شيخ تحسين جو چوڻ هو ته صنعتي واڌ ويجهه لاءِ وفاقي بجيٽ ۾ ڳري ٽيڪسن ۾ گهٽتائي ڪئي وڃي، حڪومت 500 ارب رپين جا نوان ٽيڪس لڳائڻ کان پاسو ڪري. هن چيو ته وفاقي بجيٽ ۾ 18 هزار ارب رپين جو ممڪنه ٽيڪس هدف مقرر ڪرڻ حقيقتن جي ابتڙ آهي.
صدر فاباٽي مطالبو ڪيو ته پيٽروليم شين ۽ ڪيپٽيو پاور پلانٽس تي لاڳو ليوي کي گهٽايو وڃي ته جيئن ملڪ جا برآمد ڪندڙ ايشيائي ملڪن سان موثر مقابلو ڪري سگهن. هن چيو ته پيداواري سرگرمين کي هٿي وٺرائڻ لاءِ گئس ۽ بجلي جي قيمتن ۾ گهٽتائي ڪئي وڃي.
هن وڌيڪ چيو ته ننڍي، وچولي ۽ ڪاٽيج انڊسٽريز جي ترقي لاءِ بجيٽ ۾ خاص پيڪيج جو اعلان ڪيو وڃي. سپر ٽيڪس صنعتي ترقي ۾ وڏي رڪاوٽ آهي جنهن کي نئين بجيٽ ۾ ختم ڪيو وڃي. شيخ تحسين جو چوڻ هو ته ايف بي آر ۽ برآمدات جا ساليانا هدف حاصل ڪرڻ لاءِ ٽيڪس ريجن ۾ ترميم ڪرڻي پوندي.
