اسلام آباد:
وزيراعظم شهباز شريف گلگت بلتستان پهتو، جتي هو ڪيترن ئي ترقياتي منصوبن جو افتتاح ڪندو ۽ دانش اسڪولن جي پيڙهه جو پٿر رکندو.
وزيراعظم آفيس جي ميڊيا ونگ موجب وزيراعظم محمد شهباز شريف هڪ ڏينهن جي دوري تي گلگت بلتستان پهتو، جتي گورنر سيد مهدي شاهه ۽ نگران وڏي وزير جسٽس (ر) يار محمد سندس آجيان ڪئي.
وفاقي وزير احسن اقبال، سردار اويس احمد خان لغاري، عطاءُ الله تارڙ، انجنيئر امير مقام، عبدالعليم خان، ڊاڪٽر خالد مقبول صديقي، وزيراعظم جو صلاحڪار راڻا ثناءُ الله ۽ خصوصي معاون طلحه برڪي به ساڻس گڏ آهن.
وزيراعظم گلگت بلتستان جي گورنر سيد مهدي شاهه ۽ گلگت بلتستان جي نگران وڏي وزير جسٽس (ر) يار محمد سان به الڳ الڳ ملاقات ڪئي، جنهن ۾ گلگت بلتستان ۾ جاري ترقياتي منصوبن تي اڳڀرائي، امن امان جي صورتحال ۽ ٻين اهم معاملن تي خيالن جي ڏي وٺ ڪئي وئي.
ياد رهي ته وزيراعظم گلگت بلتستان لاءِ قابل تجديد توانائي (سولر بجلي)، محفوظ شهرن، ليپ ٽاپ اسڪيم ۽ يوٿ بزنس اينڊ ايگري لون اسڪيم جو افتتاح ڪندو ۽ گلگت بلتستان ۾ 4 دانش اسڪولن جو پيڙهه جو پٿر رکندو.
