تهران:
ايران ۽ آمريڪا جي وچ ۾ جاري پردي پٺيان سفارتي لاڳاپن ۾ هڪ نئين پيش رفت سامهون آئي آهي، جتي تهران ڳالهين کي اڳتي وڌائڻ لاءِ واشنگٽن آڏو ڪيترائي اهم مطالبا رکيا آهن.
ايراني اختيارين موجب ايران خطي ۾ جاري ڇڪتاڻ جو خاتمو، منجمد اثاثن جي واپسي ۽ سامونڊي رستن تي ايراني جهازن جي تحفظ کي ڳالهين جو اهم حصو بڻائڻ چاهي ٿو.
ايراني ميڊيا جي رپورٽن ۾ دعويٰ ڪئي وئي آهي ته آمريڪا طرفان موڪليل تازن پيغامن سان ٻنهي ملڪن وچ ۾ ڪجهه معاملن تي مفاصلو گهٽجي ويو آهي پر اعتماد جي فضا اڃا مڪمل طور تي بحال نه ٿي سگهي آهي.
ايراني پرڏيهي وزارت جي ترجمان اسماعيل بقائي پنهنجي بيان ۾ چيو ته تهران ڳالهين کي سنجيدگي سان وٺي رهيو آهي پر ماضي جي تجربن سبب اڃا به ڪجهه تحفظات موجود آهن.
هن چيو ته ايران چاهي ٿو ته لبنان سميت مختلف محاذن تي جاري ڇڪتاڻ ختم ٿئي ۽ خطي ۾ ڇڪتاڻ گهٽجي.
هن ان تاثر کي به رد ڪيو ته ايٽمي پروگرام بابت گردش ڪندڙ ڪجهه رپورٽون حقيقتن تي ٻڌل آهن.
ترجمان موجب ڳالهين جا حتمي تفصيل لاڳاپيل اختيارين ۽ ڳالهين واري ٽيم مناسب وقت تي سامهون آڻيندي.
ٻئي طرف ڊونلڊ ٽرمپ هڪ بيان ۾ چيو آهي ته آمريڪا ايران سان ڳالهيون ڪري رهيو آهي ۽ واشنگٽن جي پهرين ترجيح ايران کي ايٽمي هٿيارن جي حاصلات کان روڪڻ آهي.
هن اشارو ڏنو ته افزوده يورينيم جي ذخيرن جي حوالي سان به سخت موقف اختيار ڪيو پيو وڃي.
