سوات درياهه ۾ جانورن کي ذبح ڪرڻ ۽ رت ۽ ٻيا لاش اڇلائڻ جي وڊيو سوشل ميڊيا تي وائرل ٿيڻ کانپوءِ خيبرپختونخواهه حڪومت واقعي جو نوٽيس ورتو آهي.
رپورٽن مطابق بحرين واري علائقي ۾ درياهه جي ڪناري تي غيرقانوني جانورن جو ذبح خانو ٺاهيو ويو. ڪافي عرصي کان درياهه جي ڪنارن تي جانورن کي ذبح ڪيو پيو وڃي پر مقامي انتظاميه ان صورتحال کان بلڪل بي خبر رهي ۽ هاڻي وڊيو وائرل ٿيڻ کانپوءِ اختياريون حرڪت ۾ اچي ويون آهن.
خيبرپختونخواهه حڪومت واقعي جو نوٽيس وٺندي اپر سوات جي ضلعي انتظاميا کي واقعي جي فوري طور تي ايف آءِ آر داخل ڪرڻ جي هدايت ڪئي آهي.
حڪومتي حڪمن تي عمل ڪندي انتظاميا ذميوارن خلاف ڪارروائي شروع ڪري ڇڏي آهي.
ياد رهي ته ماضي ۾ به دريائن جي ڪنارن ۽ سياحتي هنڌن تي غير قانوني ذبح خانا قائم ڪرڻ ۽ صفائي جي ناقص انتظامن سبب ماحولياتي گدلاڻ جا واقعا سامهون آيا آهن.
طبي ماهرن جو چوڻ آهي ته مقامي سطح تي انتظامي لاپرواهي سبب ڪچرو دريائن ۾ اڇلائڻ واري عمل سان عوام جي صحت کي سخت خطرو آهي.
