سعودي حڪومت اعلان ڪيو آهي ته هن سال حج جو خطبو دنيا جي 35 وڏين ٻولين ۾ ترجمي سان نشر ڪيو ويندو ته جيئن مختلف ملڪن جا مسلمان خطبي کي پنهنجي ٻولي ۾ سمجهي سگهن.
سعودي وزارت حج ۽ عمره موجب ان اقدام جو مقصد سڄي دنيا مان آيل لکين حاجين ۽ ناظرين تائين خطبي حج جو پيغام آسان ۽ موثر انداز ۾ پهچائڻ آهي.
وزارت موجب حج جو خطبو ڪيترن ئي ٻولين ۾ لائيو ترجمي سان نشر ڪيو ويندو، جن ۾ انگريزي، فرينچ، انڊونيشي، ترڪي، فارسي، روسي، چيني ۽ ٻين عالمي ٻولين شامل آهن.
خاص طور تي پاڪستان جي حاجين لاءِ حج جو خطبو قومي ٻولي اردو سان گڏ علائقائي ٻولين پنجابي ۽ پشتو ۾ نشر ڪرڻ جو فيصلو ڪيو ويو آهي.
سعودي عملدارن جو چوڻ آهي ته جديد ٽيڪنالاجي ۽ ڊجيٽل پليٽ فارم ذريعي دنيا جي لکين ماڻهن تائين حج جو خطبو پهچايو ويندو ته جيئن وڌ کان وڌ مسلمان هن روحاني پيغام مان فائدو وٺي سگهن.
ماهرن موجب حج جو خطبو مختلف ٻولين ۾ نشر ڪرڻ اسلامي تعليمات ۽ حج جي پيغام کي عالمي سطح تي عام ڪرڻ ۾ اهم ڪردار ادا ڪندو.
