ايران خلاف آمريڪي-اسرائيلي جنگ دوران عراق ۾ ڳجهي اسرائيلي فوجي اڏي جي انڪشاف عراق ۾ ڇڪتاڻ پيدا ڪري ڇڏي آهي.
ميڊيا رپورٽن موجب مغربي ميڊيا طرفان بيس بابت تفصيل سامهون اچڻ کانپوءِ عراقي اختيارين اڃا تائين بيس بابت ڪو به تبصرو ناهي ڪيو.
ٻن عراقي سيڪيورٽي اهلڪارن AFP کي هڪ انٽرويو ۾ ٻڌايو ته اسرائيلي فورسز ايران جي خلاف تازي جنگ دوران عراقي ريگستان ۾ هڪ پراڻي ايئرپورٽ کي استعمال ڪندي هڪ فوجي اڏو قائم ڪيو. وال اسٽريٽ جرنل جي هڪ رپورٽ پڻ ان واقعي جي تصديق ڪئي آهي.
ايران تي آمريڪي ۽ اسرائيلي حملي کانپوءِ اسرائيلي فوجين ملڪ جي ڏکڻ اولهه واري علائقي نجف جي ريگستان ۾ مليا ۽ انهن عراقي فورسز سان جهيڙو ڪيو جنهن ۾ هڪ عراقي سپاهي مارجي ويو ۽ 2 زخمي ٿي پيا.
سيڪيورٽي اهلڪار چيو ته اسرائيلي فورسز نجف ريگستان ۾ هڪ ڇڏيل هوائي پٽي ۾ هڪ بيس قائم ڪيو.
هن چيو ته هاڻي اتي فورسز نه آهن پر شايد اهي سامان ڇڏي ويا آهن. هن وڌيڪ چيو ته اسرائيلي آپريشن آمريڪا جي سهڪار سان ٿي رهيو آهي پر اهو واضح ناهي ته اتي فوج ڪيتري وقت تائين موجود هئي يا انهن جو مشن ڇا هو.
ٻئي طرف، اسرائيلي فوج به ان حوالي سان تبصرو لاءِ اي ايف پي جي درخواست جو جواب نه ڏنو.
