ملتان جي نشتر اسپتال ۾ ايڇ آءِ وي جي شڪي مريض جي ٽيسٽ کان اڳ سرجري ڪرڻ واري معاملي جي جاچ لاءِ اعليٰ سطحي انڪوائري ڪميٽي جوڙي وئي آهي.
تفصيل موجب واقعي کانپوءِ هيلٿ ڪيئر اسٽاف جي ايڇ آءِ وي انفيڪشن ۽ انفيڪشن ڪنٽرول پروٽوڪول ۾ لاپرواهي تي خدشا وڌي ويا آهن.
اسپتال جي ميڊيڪل سپرنٽينڊنٽ طرفان جاري ڪيل بيان موجب 4 رڪني انڪوائري ڪميٽي واقعي جي جاچ ڪندي ٻن ڏينهن اندر رپورٽ پيش ڪندي.
انڪوائري ڪميٽي جي ميمبر ۽ وبائي بيمارين جي انچارج ڊاڪٽر رواد نور هڪ خانگي نيوز چينل سان ڳالهائيندي چيو ته صورتحال ڪنٽرول ۾ آهي ۽ سمورن سرجيڪل اوزارن کي اسٽريلائيز ڪرڻ لاءِ احتياطي اپاءَ ورتا ويا آهن.
اسپتال ذريعن جو چوڻ آهي ته سرجري اڱاري 19 مئي تي اسپتال جي آپريٽنگ ٿيٽر ۾ ڪئي وئي. هڪ جونيئر ڊاڪٽر ٻڌايو ته آپريشن کان اڳ مريض جي ايڇ آءِ وي اسڪريننگ جي رپورٽ موجود نه هئي، پر ان اعتراض کي مبينه طور تي نظرانداز ڪيو ويو ۽ ڪارروائي اڳتي وڌي وئي.
وارڊ انچارج ڊاڪٽر مسعود هراج جو چوڻ هو ته کيس اربع جي صبح معاملي جي خبر پئي ۽ فوري طور تي ميڊيڪل سپرنٽينڊنٽ ۽ وبائي بيمارين جي انچارج کي فوري طور تي احتياطي تدبيرون اختيار ڪرڻ لاءِ چيو.
ڊاڪٽر هراج وڌيڪ واضح ڪيو ته مريض جون ٻه سرجريون ٿي چڪيون آهن، جنهن دوران سندس ايڇ آءِ وي جي اسڪريننگ ڪئي وئي ۽ نتيجا ناڪاري آيا. بعد ۾ مريض جي ايڇ آءِ وي مثبت هجڻ جي تصديق ڪئي وئي، پر نتيجا واپس اچڻ کان اڳ سرجري ڪئي وئي.
هن وڌيڪ چيو ته ابتدائي جاچ مان معلوم ٿيو آهي ته ايڇ آءِ وي پوزيٽو مريض جو آخري آپريشن ٿيو هو.
