اسلام آباد:
نئين بجيٽ ۾ حڪومت کي آءِ ايم ايف جي تجويزن جي منظوري جو انتظار آهي، جنهن ۾ پگهاردار طبقي کي وڏي ٽيڪس رليف ڏني ويندي.
هڪ خانگي ٽي وي جي رپورٽ موجب وفاقي حڪومت ايندڙ مالي سال 27-2026 جي بجيٽ کي حتمي شڪل ڏيڻ جي مرحلي ۾ آهي پر ڪيترن ئي اهم ٽيڪس قدمن ۽ رليف پيڪيجز تي عملدرآمد لاءِ عالمي مالياتي فنڊ (آءِ ايم ايف) جي منظوري جو انتظار آهي.
ذريعن موجب رپورٽ ۾ چيو ويو آهي ته حڪومت مختلف شعبن کي رليف ڏيڻ ۽ ٽيڪس نظام ۾ ڪجهه تبديلين جون تجويزون عالمي مالياتي اداري آڏو رکي ڇڏيون آهن.
بجيٽ تجويزن ۾ پگهاردار طبقي لاءِ انڪم ٽيڪس سليب ۾ گهٽتائي، سپر ٽيڪس جي شرح ۾ 2 سيڪڙو گهٽتائي ۽ ايڪسپورٽ سيڪٽر تي لاڳو هڪ سيڪڙو ايڊوانس انڪم ٽيڪس ختم ڪرڻ جي سفارش شامل آهي.
ان کان علاوه پراپرٽي سيڪٽر لاءِ مختلف مراعات ۽ سهولتن تي غور ڪيو پيو وڃي ته جيئن هن خاص شعبي ۾ سيڙپڪاري ۽ ڪاروباري سرگرمين کي هٿي وٺرائي سگهجي.
ٻئي طرف رپورٽ موجب ڪجهه شين تي ٽيڪس وڌائڻ جي تجويز به غور هيٺ آهي. ان حوالي سان ذريعن جو چوڻ آهي ته آءِ ايم ايف سان سولر پينلز، هائبرڊ گاڏين ۽ ٻين 20 کان وڌيڪ شين تي جنرل سيلز ٽيڪس 18 سيڪڙو تائين وڌائڻ جي معاملي تي صلاح مشورا جاري آهن.
ياد رهي ته حڪومت ماحول دوست ٽيڪنالاجي جي واڌاري لاءِ برقي گاڏين تي نسبتاً گهٽ ٽيڪس جي شرح برقرار رکڻ جي به درخواست ڪئي آهي. آفيسرن جي مطابق، تجويز توانائي جي تحفظ ۽ ماحولياتي مقصدن جي حوالي سان ڪئي وئي آهي ۽ پڻ 1.4 بلين ڊالر جي لچڪدار ۽ استحڪام سهولت پروگرام سان ڳنڍيل آهي.
سرڪاري ذريعن جو حوالو ڏيندي رپورٽ ۾ چيو ويو آهي ته ٽيڪس گڏ ڪرڻ جا هدف به حڪومت لاءِ هڪ وڏو چئلينج بڻيل آهن. هلندڙ مالي سال لاءِ ايف بي آر جو هدف گهٽائي 13 هزار 428 ارب رپيا ڪيو ويو آهي جڏهن ته ايندڙ مالي سال لاءِ ان کي وڌائي 15 هزار 264 ارب رپيا ڪرڻ جي تجويز غور هيٺ آهي.
اختيارين جو چوڻ آهي ته حڪومت ۽ آءِ ايم ايف وچ ۾ ان وڏي مقصد کي حاصل ڪرڻ لاءِ مختلف مالياتي آپشنز تي تفصيلي مشاورت جاري آهي.
