ريلوي واري وفاقي وزير حنيف عباسي چيو آهي ته ايران پاڪستان کان جلد ريلوي ٽريڪ شروع ڪرڻ وارو آهي.
اهڙن خيالن جو اظهار هن ڪراچي ۾ پاڪستان ريلوي تحت دي انٽرنيشنل اسڪول جي افتتاحي تقريب کي خطاب ڪندي ڪيو. ان موقعي تي گورنر سنڌ نهال هاشمي پڻ موجود هو.
حنيف عباسي چيو ته ريلوي ٽريڪ جلد يورپ ڏانهن هلي ويندي، ڪراچي سرڪلر ريلوي ٺاهڻ سنڌ حڪومت جي ذميواري آهي. مان وزيراعظم شهباز شريف جو شاگرد آهيان ۽ ساڻس 25 سالن کان ڪم ڪري رهيو آهيان، ريلوي جي 14 اسڪولن، رائل پام ۽ 7 اسپتالن کي آئوٽ سورس ڪري رهيو آهيان. اهي 28 مئي تائين ريلوي کي ڊجيٽلائيز ڪري رهيا هئا پر عالمي صورتحال سبب اها هاڻي هڪ مهيني کانپوءِ آپريشنل ٿي ويندي.
ريلوي واري وزير چيو ته روهڙي ڪراچي جو سڀ کان ڏکيو ٽريڪ آهي جيڪو 1861ع کان 1868ع تائين وارو ٽريڪ آهي، وزيراعظم فيصلو ڪيو آهي ته 480 ڪلوميٽر جو هي ٽريڪ 2 ارب ڊالرن جي لاڳت سان تعمير ڪيو پيو وڃي. هي ٽريڪ اٽڪل 700 ارب روپين ۾ مڪمل ٿيندو.
حنيف عباسي چيو ته پاڪستان کي دنيا ۾ وڏي اهميت حاصل آهي، جيڪي ماڻهو ٻاهر رهي ڪري پنهنجي سڃاڻپ لڪائيندا هئا، اهي هاڻي پنهنجي سڃاڻپ نه لڪائيندا. پاڪستان پنهنجي 78 سالن جي تاريخ ۾ اهڙو منظر ڪڏهن به نه ڏٺو آهي. هن وقت روس، چين، ايران، آمريڪا، خليجي ملڪ سڀ اسان ڏانهن ڏسي رهيا آهن. اسان ايران ۽ سعودي عرب کي هڪ ٻئي سان وڙهڻ جي اجازت نه ڏني.
ريلوي واري وزير چيو ته پاڪستان سعودي عرب ۽ ايران کي ڪامياب سفارتڪاري ذريعي جنگ ڪرڻ نه ڏني. ڳالهائڻ تمام سولو آهي پر قوم لاءِ 24 ڪلاڪ جاڳڻ هڪ مختلف ليول آهي.
ان کان اڳ ميڊيا سان ڳالهائيندي ريلوي واري وفاقي وزير چيو ته ڪراچي سرڪلر ريلوي ٺاهڻ سنڌ حڪومت جي ذميواري آهي، هو 25 ڊسمبر تي ريلوي ٽريڪ کي ٿرڪول سان ڳنڍڻ وارا آهن، روهڙي کان نوڪنڊي 900 ڪلوميٽر ۽ نوڪنڊي کان تفتان 87 ڪلوميٽر ٽريڪ بحال ڪيو پيو وڃي، جيڪڏهن ريلوي نه هلندي ته پاڪستان ۾ نه هلندي.
