ڪراچي:
پاڪستان ۽ چين وچ ۾ واپار ۾ وڏيون اڳڀرائيون ٿيون آهن، ٻنهي ملڪن وچ ۾ اربين ڊالرن جا معاهدا متوقع آهن.
ايڪسپريس نيوز موجب سي پيڪ جي ڪاميابي لاءِ چين جو 52 رڪني اعليٰ سطحي واپاري وفد پهريون ڀيرو پاڪستان پهچي ويو آهي. هي اعليٰ سطحي چيني وفد 8 مئي کان 14 مئي تائين پاڪستان ۾ رهندو.
چيني واپاري وفد اسلام آباد، لاهور ۽ ڪراچي جي دوري دوران بي 2 بي جا معاهدا ڪندو. پاڪستان چائنا بزنس ڪائونسل موجب چيني وفد اي ڪامرس، ٽيلي ڪام، سولر ۽ توانائي جي شعبن ۾ اهم معاهدن تي صحيحون ڪندو.
ان کان علاوه آءِ بي آءِ پاڪستان ڊجيٽل اڪانومي پروگرام ذريعي وفد انجنيئرنگ، ڪيميڪل، ٽيڪسٽائيل ۽ بلڊنگ مواد ۾ اهم معاهدن تي صحيحون ڪندو. اهڙي طرح ڪراچي ۾ اعليٰ سطحي چيني وفد سان اليڪٽرڪ گاڏين، طبي ۽ صنعتي سامان جا اهم معاهدا پڻ ڪيا ويندا.
هن دوري دوران پاڪستان ۽ چين سي پيڪ منصوبن تحت اربين ڊالرن جي معاهدن تي صحيحن جو امڪان آهي.
وفد جي دوري دوران فيڊريشن چيمبر آف ڪامرس سميت ڪراچي، لاهور ۽ اسلام آباد چيمبرز سان ملاقاتون ڪيون ويون. ڪراچي ۾ چيني وفد سان اهم ملاقات دوران جي 2 جي معاهدن جو به امڪان آهي.
ان سلسلي ۾ ٻنهي ملڪن واپار، ڊجيٽل معيشت ۽ صنعتي تعاون لاءِ گڏيل اقتصادي هيڊ ڪوارٽر ٺاهڻ جو فيصلو ڪيو آهي.
