پي سي بي جو سعودي عرب ۾ ڪرڪيٽ اسٽيڊيم ٺاهڻ جو فيصلو

پي سي بي سعودي عرب ۾ ڪرڪيٽ اسٽيڊيم ٺاهيندو ۽ جده مستقبل ۾ پي ايس ايل ميچن جي ميزباني به ڪري سگهندو. ان حوالي سان شروعاتي طور تي گورننگ بورڊ کان منظوري ورتي وئي آهي پر اڃا وڌيڪ معاملا غور هيٺ آهن ۽ حتمي معاهدو ٿيڻو آهي. تفصيل موجب پاڪستان ڪرڪيٽ بورڊ سعودي عرب ۾ به راندين کي فروغ ڏيڻ چاهي ٿو، جتي ايشيائي نسل جي ماڻهن سميت پاڪستانين جو وڏو انگ راندين ۾ گهري دلچسپي رکي ٿو، سعودي حڪومت به پنهنجي ملڪ ۾ راندين جي سرگرمين جي ڀرپور حوصلا افزائي ڪري رهي آهي. ان حوالي سان مختلف قدم کنيا پيا وڃن، پي سي بي جده ۾ ڪرڪيٽ اسٽيڊيم ٺاهڻ جي خواهش جو اظهار ڪيو آهي، گذريل ڏينهن بورڊ آف گورنرز جي اجلاس ۾ سعودي عرب ڪرڪيٽ فيڊريشن سان ان حوالي سان دلچسپي جي اظهار جي منظوري به ڏني هئي. ذريعن موجب اسٽيڊيم جي سائيٽ جي چونڊ لاءِ سعودي عرب ۾ مختلف هنڌن جو به جائزو ورتو پيو وڃي، ذريعن جو چوڻ آهي ته اهو معاملو ابتدائي مرحلن ۾ آهي، جيڪڏهن مقامي اختيارين سان ڳالهيون ڪامياب ٿيون ته معاهدو ڪيو ويندو، جنهن کانپوءِ ڪم شروع ڪيو ويندو. چيئرمين پي سي بي محسن نقوي پنهنجي رفتار جي حوالي سان مشهور آهي، جيڪڏهن سڀ ڪجهه ساڳئي ريت رهي ته معاهدي کانپوءِ هڪ سال ۾ اسٽيڊيم تيار ٿي سگهي ٿو. ان فيصلي سان نه رڳو مداحن کي اتي ڪرڪيٽ ڏسڻ جو موقعو ملندو پر نوجوان ڪرڪيٽرن کي به پنهنجي صلاحيتن کي ترقي وٺرائڻ ۽ اڳتي اچڻ جا موقعا ملندا.



Source link