آمريڪا ۾ اعليٰ تعليم حاصل ڪرڻ جي خواهش رکندڙ پاڪستاني شاگردن ۽ محققن لاءِ خوشخبري آهي.
آمريڪا ۾ فلبرائٽ اسڪالرشپ پروگرام تحت 85 پاڪستاني اميدوارن کي چونڊيو ويو آهي. اهي اسڪالرشپون انهن شاگردن ۽ محققن کي ڏنيون وينديون آهن جيڪي ايندڙ تعليمي سيشن ۾ آمريڪي يونيورسٽين ۾ مختلف ماسٽرس، پي ايڇ ڊي ۽ ٽيچنگ ٽريننگ پروگرامن ۾ حصو وٺندا.
آمريڪي ايجوڪيشن فائونڊيشن پاڪستان (يو ايس اي ايف پي) موجب هن سال ڪل 85 پاڪستانين کي فلبرائٽ اسڪالر شپ ڏنيون ويون آهن، جن ۾ 71 اميدوار ماسٽرز ڊگري، 14 اميدوار پي ايڇ ڊي پروگرام ۽ 6 اميدوار فلبرائٽ فارين لينگويج ٽيچنگ اسسٽنٽ (FLTA) فيلوشپ لاءِ آهن.
چونڊيل پاڪستاني شاگرد ۽ محقق آمريڪا جي مختلف يونيورسٽين ۾ پنهنجون تعليمي ۽ تحقيقي سرگرميون جاري رکندا، جتي کين عالمي سطح جي تعليم، تحقيق ۽ عالمي علمي ماحول مان فائدو حاصل ڪرڻ جو موقعو ملندو.
Fulbright پروگرام آمريڪا ۽ پاڪستان جي وچ ۾ تعليمي تعاون جي اهم منصوبن مان هڪ آهي، جيڪو ٻنهي ملڪن جي حڪومتن پاران گڏيل طور تي هلي رهيو آهي.
هن پروگرام جو مقصد پاڪستاني شاگردن، محققن ۽ استادن کي اعليٰ تعليم ۽ تحقيق جا بهتر موقعا فراهم ڪرڻ ۽ ٻنهي ملڪن جي وچ ۾ تعليمي ۽ ثقافتي لاڳاپن کي وڌيڪ مضبوط ڪرڻ آهي.
آمريڪي ايجوڪيشن فائونڊيشن پاڪستان جي انگن اکرن موجب 2005ع کان وٺي فلبرائٽ پروگرام تحت 3 هزار کان وڌيڪ پاڪستاني شاگردن ۽ محققن اسڪالرشپس حاصل ڪيون آهن.
پروگرام کي مڪمل طور تي فنڊ ٿيل اسڪالر شپ طور سڃاتو وڃي ٿو، جنهن تحت چونڊيل اميدوارن کي ٽيوشن فيس، رهائش، سفري خرچ ۽ ٻيون تعليمي سهولتون فراهم ڪيون وينديون آهن، ته جيئن اهي بغير مالي دٻاءُ جي پنهنجي پڙهائي مڪمل ڪري سگهن.
Fulbright اسڪالرشپ دنيا جي معروف بين الاقوامي تعليمي پروگرامن مان هڪ آهي ۽ هر سال قابليت جي بنياد تي چونڊيو ويندو آهي، پاڪستاني شاگردن کي معزز آمريڪي يونيورسٽين ۾ اعلي تعليم ۽ تحقيق جا موقعا فراهم ڪن ٿا.
