سڄي ملڪ ۾ منشيات خلاف ڪارروايون تيز ڪندي قانون لاڳو ڪندڙ ادارن ٻن وڏين ڪاررواين ۾ وڏي مقدار ۾ منشيات هٿ ڪري اسمگلنگ جون ڪوششون ناڪام بڻائي ڇڏيون. اينٽي نارڪوٽڪس فورس (اي اين ايف) ڪراچي پورٽ تي ڪارروائي ڪندي ڪيمرون موڪليندڙ ڪنٽينر مان 180 ڪلو گرام آئس (ميٿمفيٽامائن) هٿ ڪري ورتي. اختيارين موجب، منشيات استعمال ٿيل ڪپڙن جي بنڊلن ۾ مهارت سان لڪايو ويو هو. بازيابي کانپوءِ سمگلنگ نيٽ ورڪ ۾ ملوث جوابدارن جي گرفتاري لاءِ جاچ جو دائرو وسيع ڪيو ويو آهي. اي اين ايف جو چوڻ آهي ته ڪامياب آپريشن منشيات جي اسمگلنگ جي عالمي نيٽ ورڪ لاءِ وڏو ڌڪ آهي ۽ بندرگاهن تي سامان جي موثر نگراني جو ثبوت آهي. ٻئي طرف ايڪسائيز کاتي پشاور جي ناردرن بائي پاس تي وڏي ڪارروائي ڪندي 19 ڪلو کان وڌيڪ چرس هٿ ڪري ورتي. بيورو آف انٽيليجنس اينڊ انويسٽيگيشن اسڪواڊ جي ٽيم ڪارروائي ڪندي گاڏي نمبر LWH-2020 مان 19 هزار 200 گرام چرس هٿ ڪري جوابدار نعمت شاهه کي موقعي تي گرفتار ڪري ورتو. اها ڪارروائي صوبائي انچارج عاڪف نواز خان جي نگراني ۾ انسپيڪٽر محمد رياض ۽ سندس ٽيم ڪئي. جوابدار خلاف ايڪسائيز پوليس اسٽيشن پشاور ۾ ڪيس داخل ڪيو ويو آهي. اختيارين موجب منشيات خلاف زيرو ٽالرنس واري پاليسي تي سختي سان عمل ڪيو پيو وڃي ۽ ايڪسائيز واري وزير سيد فخر جهان جي هدايتن تي اهڙيون ڪارروايون تيز ڪيون پيون وڃن.
Source link
Leave a Comment Leave a Comment
