ڀارت ۾ ڪروچ جنتا پارٽي جي سخت احتجاج کانپوءِ ڀارت جي يونين جي تعليم واري وزير ڌرميندر پراڻن پنهنجي عهدي تان استعيفيٰ ڏئي ڇڏي آهي.
ميڊيا رپورٽن موجب اهو فيصلو اهڙي وقت ۾ ڪيو ويو آهي جڏهن سڄي ملڪ ۾ شاگردن پاران امتحاني نظام ۾ مبينا بي ضابطگين ۽ پيپر ليڪ ٿيڻ واري معاملي تي سخت احتجاج جاري آهي.
ذريعن موجب گذريل ڪيترن ئي هفتن کان نئين دهلي سميت ڀارت جي مختلف شهرن ۾ هزارين شاگرد روڊن تي نڪري آيا هئا ۽ تعليم واري وزير جي استعيفيٰ جو مطالبو ڪري رهيا هئا.
احتجاج ڪندڙن الزام هنيو ته امتحاني نظام ۾ بار بار بي ضابطگين سان لکين شاگردن جو مستقبل متاثر ٿي رهيو آهي، جڏهن ته حڪومت موثر احتساب ڪرڻ ۾ ناڪام وئي آهي. احتجاج دوران ڪيترن ئي هنڌن تي پوليس ۽ مظاهرين وچ ۾ چڪريون ٿيون، ڳوڙها آڻيندڙ گيس جو استعمال ڪيو ويو ۽ ڪجهه علائقن ۾ سيڪيورٽي سخت ڪئي وئي.
پنهنجي استعيفيٰ ۾، ڌرميندرا پرڌان چيو ته هو نوجوانن جي اميدن ۽ ملڪ جي وڏي مفاد جو احترام ڪندي استعيفيٰ ڏئي رهيو آهي. سندس چوڻ هو ته هو نٿا چاهين ته ”ملڪ دشمن عناصر“ جاري صورتحال مان فائدو وٺن يا شاگردن جو تعليمي مستقبل وڌيڪ متاثر ٿئي. هن وزيراعظم جي اعتماد ۽ تعاون تي به شڪريو ادا ڪيو.
سياسي مبصرن جو چوڻ آهي ته استعيفيٰ کي وزيراعظم مودي جي حڪومت لاءِ وڏي سياسي ڇڪتاڻ جي طور تي ڏٺو پيو وڃي، ڇو ته حڪومت پهريون ڀيرو شاگرد تحريڪ جي دٻاءَ هيٺ گوڏن ڀر ٿيڻ تي مجبور ٿي آهي.
