ڪراچي:
ضلعي اولهه ۾ فائرنگ جي واقعن ۾ 2 ڄڻا مارجي ويا ۽ 7 ڄڻا زخمي ٿي پيا، فائرنگ جو پهريون واقعو اورنگي ٽائون ۾ ٻارڙن ۾ جهيڙو شدت اختيار ڪرڻ ۽ بالغن جي جهيڙي سبب پيش آيو، جڏهن ته فائرنگ جي ٻئي واقعي ۾ ذاتي دشمني سبب هڪ ڄڻو مارجي ويو.
تفصيل موجب اورنگي ٽائون جي علائقي ايم پي آر ڪالوني ۾ اڻڄاتل هٿياربندن جي فائرنگ جي نتيجي ۾ 8 ڄڻا زخمي ٿي پيا، جنهن ۾ هڪ نوجوان زخمن جا سور نه سهندي فوت ٿي ويو.
ضلعي ويسٽ پوليس جي ترجمان جو چوڻ آهي ته شروعاتي اطلاعن موجب ٻارڙن وچ ۾ جهيڙو وڌي ويو جنهن ۾ وڏيرن به کودبا ۽ فائرنگ سبب ڪيترائي ماڻهو زخمي ٿي پيا.
ايس ايڇ او اورنگي ٽائون موجب مارجي ويلن جي سڃاڻپ 15 ورهين جي احسان الله ولد معين خان جي نالي سان ٿي آهي، جڏهن ته زخمين جي سڃاڻپ 23 ورهين جي شير نواز، 25 ورهين جي احمد، 25 ورهين جي زين الله، 29 ورهين جي شمس الرحمان، 23 ورهين جي نياز ۽ ڊي محمد جلال طور ٿي آهي.
پوليس جو چوڻ آهي ته زخمين کي سول اسپتال ۾ طبي امداد ڏني پئي وڃي، جڏهن ته پوليس سندن بيان پڻ رڪارڊ ڪري رهي آهي، پوليس واقعي واري هنڌ ڪرائم سين يونٽ کي طلب ڪري ثبوت حاصل ڪري ورتا آهن، وڌيڪ جاچ ڪئي پئي وڃي.
ٻئي طرف اورنگي ٽائون جي علائقي نصيب چوڪ، سيڪٽر 11 ۽ 11 توري، بنگش ڪالوني ويجهو فائرنگ ۾ هڪ ڄڻو مارجي ويو، جنهن جو لاش چاڙهي جي رضاڪارن پاران عباسي شهيد اسپتال پهچايو ويو.
اقبال مارڪيٽ پوليس جو چوڻ آهي ته مارجي ويل نوجوان جي سڃاڻپ 25 ورهين جي شعيب جي نالي سان ٿي آهي، فائرنگ جو واقعو اڻڄاتل جوابدارن ڪيو آهي، جڏهن ته واقعو ذات پات جي رنجش جو لڳي ٿو، جنهن بابت پوليس وڌيڪ جاچ ڪري رهي آهي.
