اسلام آباد:
حج 2027ع جي رجسٽريشن اڄ باضابطا طور تي شروع ٿي وئي آهي، ان حوالي سان سرڪاري ۽ خانگي اسڪيمن جا تفصيل پڌرا ڪيا ويا آهن.
حج 2027ع جي حج رجسٽريشن جي افتتاحي تقريب کي خطاب ۽ ميڊيا سان ڳالهائيندي مذهبي معاملن واري وفاقي وزير سردار محمد يوسف چيو ته نيشنل آءِ ٽي بورڊ جي سهڪار سان حج سسٽم کي ڊيجيٽل ڪيو ويو آهي. حج 2027ع جي رجسٽريشن اڄ کان باضابطا طور تي شروع ٿي وئي آهي. هن چيو ته حج نظام کي وڌيڪ شفاف بڻائڻ لاءِ قدم کنيا پيا وڃن ته جيئن حاجين کي بهتر سهولتون فراهم ڪري سگهجن.
وفاقي وزير چيو ته حج 2027ع جي رجسٽريشن مڪمل طور تي مفت هوندي ان لاءِ ڪا به فيس نه ورتي ويندي. هن چيو ته رجسٽريشن پهرين اچو پهرين پائو جي بنياد تي ڪئي ويندي جڏهن ته سرڪاري ۽ خانگي حج اسڪيمن لاءِ رجسٽريشن لازمي قرار ڏني وئي آهي. ڪو به ماڻهو بغير رجسٽريشن جي حج 2027 لاءِ درخواست جمع نه ڪرائي سگهندو.
سردار محمد يوسف چيو ته حج 2027ع لاءِ صحيح پاسپورٽ لازمي هوندو ۽ پاسپورٽ جي صحيحيت گهٽ ۾ گهٽ 26 نومبر 2027ع تائين هجڻ گهرجي، هن چيو ته هڪ ئي خاندان جا ميمبر گڏيل طور تي رجسٽريشن ڪرائي سگهندا، جڏهن ته پرڏيهه ۾ رهندڙ پاڪستاني به دنيا جي ڪنهن به ملڪ مان پنهنجي رجسٽريشن مڪمل ڪري سگهندا.
هن چيو ته حج جي رجسٽريشن سڄي ملڪ ۾ مقرر بئنڪن ذريعي ٿيندي، جڏهن ته عازمين گهر ويهي آن لائين رجسٽريشن جي سهولت مان فائدو حاصل ڪري سگهندا.
مذهبي معاملن واري وزارت حج 2027ع جي رجسٽريشن جو باقاعده شيڊول به جاري ڪري ڇڏيو آهي ۽ رجسٽريشن مڪمل ٿيڻ کانپوءِ ئي سرڪاري يا خانگي حج اسڪيم جي چونڊ ممڪن ٿي سگهندي. هن اميدوارن کي هدايت ڪئي ته هو وقت تي رجسٽريشن مڪمل ڪن.
مذهبي معاملن واري وفاقي وزير حج 2026 بابت ڳالهائيندي چيو ته هن سال سڀ کان ڪامياب حج هو. پاڪستاني زائرين انتظامن مان ڏاڍا مطمئن آهن. هن چيو ته وزيراعظم جي سمورن هدايتن تي مڪمل عملدرآمد ڪيو ويو جڏهن ته سعودي عرب به بهترين انتظام ڪيا آهن. پاڪستان ۾ سعودي سفير به ان حوالي سان ڀرپور تعاون ڪيو.
سردار محمد يوسف چيو ته روڊ ٽو مڪي اسڪيم به لاهور کان شروع ڪئي وئي جنهن مان 80 سيڪڙو پاڪستاني حاجين کي فائدو ٿيو. هن چيو ته هن سال زائرين کان هڪ سيڪڙو کان به گهٽ شڪايتون مليون آهن، جيڪو انتظامن تي بي اعتمادي جو ثبوت آهي.
هن وڌيڪ چيو ته وزارت هن سال حج ڪندڙ پاڪستاني حاجين جي رقم واپس ڪرڻ جو اندازو لڳائي رهي آهي ۽ 2026ع ۾ حج ڪندڙ پاڪستاني حاجين کي ڪجهه رقم واپس ڪئي ويندي، وزارت جي اها روايت رهي آهي ته هر سال بچيل رقم جو هڪ حصو حاجين کي واپس ڪيو ويندو آهي.
مذهبي معاملن واري وفاقي وزير چيو ته پاڪستان ۾ مسلمانن جي آبادي 230 ملين کان وڌي وئي آهي ان ڪري حج ڪوٽا وڌائڻ بابت سعودي حڪومت سان ڳالهيون جاري آهن. هن چيو ته پاڪستان کي هاڻي گهٽ ۾ گهٽ 230 هزار حج ڪوٽا ملڻ گهرجي.
