وچ اوڀر ۾ ڇڪتاڻ وڌي رهي آهي، جتي ايران ۽ آمريڪا جي وچ ۾ ڳالهيون بيڪار آهن، جڏهن ته آبنائے هرمز بند آهي.
ايراني نائب پرڏيهي وزير سعيد خطيب زاده چيو آهي ته آمريڪا سان ڳالهين لاءِ نئين تاريخ مقرر ناهي ڪئي وئي. هن واشنگٽن تي تنقيد ڪندي چيو ته آمريڪا پنهنجي سخت ۽ هڪ طرفي شرطن تان پوئتي هٽڻ لاءِ تيار ناهي، جنهن سبب ڳالهين ۾ اڳڀرائي نه ٿي رهي آهي.
ايران واضح ڪيو آهي ته آبنائي هرمز کي ان وقت تائين نه کوليو ويندو جيستائين آمريڪا ايراني بندرگاهن جي بندش ختم نه ڪندو. هي آبي رستو عالمي واپار ۽ تيل جي آمد و رفت لاءِ انتهائي اهم سمجهيو وڃي ٿو.
ٻئي طرف آمريڪي صدر ٽرمپ اعلان ڪيو آهي ته ايران سان معاهدو ٿيڻ تائين بحري بندش برقرار رهندي. هن چيو ته آمريڪا ڪنهن به قسم جو دٻاءُ يا بليڪ ميلنگ قبول نه ڪندو.
ان دوران خطي ۾ ڇڪتاڻ ان وقت وڌيڪ وڌي وئي جڏهن اسرائيل جنگبندي جي باوجود ڏکڻ لبنان ۾ حملا شروع ڪيا. اسرائيلي اهلڪارن جو چوڻ آهي ته انهن هڪ نئين پيلي لائين قائم ڪئي آهي، جنهن کي هو حفاظتي حد سڏين ٿا.
فرانسيسي صدر ميڪرون لبنان ۾ فرانسيسي امن فوج جي اهلڪار جي موت جو الزام حزب الله تي لڳايو آهي، پر حزب الله ان الزام کي رد ڪري ڇڏيو آهي.
تجزيه نگارن موجب ايران، آمريڪا ۽ اسرائيل وچ ۾ وڌندڙ ڇڪتاڻ نه رڳو خطي پر عالمي معيشت ۽ سلامتي لاءِ به خطرو بڻجي سگهي ٿي، خاص طور تي جڏهن مکيه آبي گذرگاهه بند هجي ۽ ڳالهيون معطل هجن.
