او جي ڊي سي 2025ع ۾ آف شور بڊ ۾ 8 تيل ۽ گئس جي ڳولا جا بلاڪ حاصل ڪيا. او جي ڊي سي جي ترجمان موجب پاڪستان ۾ لڳ ڀڳ ٻن ڏهاڪن کانپوءِ آف شور ايڪسپلوريشن باضابطه طور تي شروع ٿي وئي آهي.
پيٽروليم واري وفاقي وزير علي پرويز ملڪ ان قدم کي توانائي جي شعبي ۾ اهم پيش رفت قرار ڏنو آهي.
او جي ڊي سي جي ترجمان موجب او جي ڊي سي ٻن بلاڪن ۾ آپريٽر ۽ ڇهن بلاڪن ۾ جوائنٽ وينچر پارٽنر هوندو. اهو اقدام سيڙپڪاري ۽ توانائي جي حفاظت کي فروغ ڏيندو.
ترجمان وڌيڪ چيو ته آف شور بڊ رائونڊ 2025 ملڪ جي توانائي جي شعبي ۾ نئين دور جي شروعات آهي.
پاڪستان پيٽروليم لميٽيڊ ۽ پيٽروليم واري وفاقي وزير سان ٿيل معاهدي جا تفصيل خميس ڏينهن پاڪستان اسٽاڪ ايڪسچينج جي انتظاميا کي موڪليا ويا آهن.
ياد رهي ته پاڪستان جي سنڌو ۽ مڪران سمنڊ ۾ تيل ۽ گئس جا وڏا ذخيرا موجود آهن. معاهدي تحت سنڌ ۽ بلوچستان جي ساحلي علائقن مان تيل ۽ گئس جا نوان ذخيرا ڳوليا ويندا.
ڳاڙھو، ڪوچي ڪريڪ، ڪيٽي بندر، بن قاسم ڏکڻ، بهر، ضرار، آف شور ڊيپ ڊي ۽ سپت بندر ۾ ذخيرا دريافت ڪيا ويندا. معاهدي تحت پاڪستان پيٽروليم لميٽيڊ گهارو ڪريڪ ۽ ڪوچي ڪريڪ ۾ پنهنجو ڪم ڪندي.
