واشنگٽن:
واشنگٽن ايران جي انقلابي گارڊز جي مالي ڍانچي بابت ڄاڻ ڏيڻ لاءِ هڪ وڏي انعامي پروگرام جو اعلان ڪيو آهي، جنهن ۾ قابل اعتماد معلومات لاءِ 15 ملين ڊالرن تائين جي آڇ ڪئي ويندي.
عالمي ميڊيا رپورٽن موجب اها آڇ آمريڪي اسٽيٽ ڊپارٽمينٽ جي انصاف واري پروگرام تحت سامهون آئي، جنهن جو مقصد ايران جي مبينا مالياتي نيٽ ورڪ کي بي نقاب ڪرڻ آهي.
آمريڪي اهلڪارن جو چوڻ آهي ته ان قدم جو بنيادي مقصد اهو سمجهڻ آهي ته اسلامي انقلابي گارڊ ڪور پنهنجي مختلف ذريعن مان فنڊ ۽ وسيلا ڪيئن منتقل ڪري ٿو ۽ ڪهڙي مالي ذريعن ذريعي پنهنجي سرگرمين کي برقرار رکي ٿو.
واشنگٽن موجب، اهو مالي ادارن، ايڪسچينج هائوسز ۽ ڪاروباري ڍانچي جي نشاندهي ڪرڻ چاهي ٿو جيڪي مبينا نيٽ ورڪ کي سهولت فراهم ڪن ٿا يا ڪنهن به سطح تي ان ۾ ملوث آهن.
آمريڪي عملدارن دليل ڏنو آهي ته ان قدم جو مقصد ايران جي مالياتي انفراسٽرڪچر تي دٻاءُ وڌائڻ ۽ انهن نيٽ ورڪن کي محدود ڪرڻ آهي جنهن ذريعي اهو مبينه طور تي غير رياستي گروپن ۽ اتحادي نيٽ ورڪن کي مدد فراهم ڪري ٿو.
