مشڪل عالمي حالتن جي باوجود پاڪستان جي سرمائيداري مارڪيٽ جي صورتحال مستحڪم آهي جتي نئين ڪمپنين جي مسلسل لسٽنگ سبب سيڙپڪارن لاءِ سيڙپڪاري جا نوان موقعا موجود آهن.
سيڪيورٽيز اينڊ ايڪسچينج ڪميشن آف پاڪستان سروس لانگ مارچ ٽائرز جي آءِ پي او جي منظوري ڏئي ڇڏي آهي، جنهن سان هلندڙ مالي سال ۾ پاڪستان اسٽاڪ ايڪسچينج تي آءِ پي اوز جو انگ 12 ٿي ويو آهي.
سروس لانگ مارچ ٽائرز ھڪڙو ٽرڪ ۽ بس ريڊيل ٽائر ٺاھيندڙ آھي جنھن ۾ 389.7 ملين شيئرز وڪري لاءِ پيش ڪيا ويا آھن.
ايس اي سي پي موجب IPO بک بلڊنگ جي طريقيڪار تحت ڪيو ويندو. 75 سيڪڙو شيئرز ادارتي ۽ اعليٰ خالص ماليت واري سيڙپڪارن لاءِ مخصوص آھن، جڏھن ته 25 سيڪڙو شيئر پرچون سيڙپڪارن لاءِ محفوظ آھن.
ايس اي سي پي موجب، آمريڪا-ايران تڪرار جي ڪري ڪي ايس اي هينڊرڊ انڊيڪس 14.54 سيڪڙو گهٽجي ويو، پر هاڪاري امڪانن تي مقامي سيڙپڪارن جي مضبوط شرڪت مارڪيٽ جو اعتماد برقرار رکيو.
ايس اي سي پي جو چوڻ آهي ته سيڙپڪارن کي سيڙپ ڪرڻ کان اڳ ڪمپني جي پراسپيڪٽس جو احتياط سان جائزو وٺڻ گهرجي.
