افغان طالبان حڪومت جي مرڪزي قيادت ۽ بدخشان جي مقامي ڪمانڊرن وچ ۾ اختلاف سامهون اچي ويا آهن.
طالبان جي حڪومت خلاف بغاوت جي نشانين کانپوءِ ملا هيبت الله جو ڪنٽرول برقرار رکڻ جو نئون حڪم جاري ڪيو ويو آهي. بدخشان جي معدني وسيلن تي جنگ ۽ عوامي بغاوت کان پوءِ، امير هيبت الله صورتحال کي قابو ڪرڻ لاءِ سخت فرمان جاري ڪيو.
ميڊيا رپورٽن موجب بدخشان ۾ ناراض طالبان ڪمانڊرن ۽ اهلڪارن جي اثاثن جي جاچ لاءِ اعليٰ سطحي وفد مقرر ڪيو ويو آهي. طالبان سربراهه ملا هيبت الله جي حڪم جي نافرماني ڪندڙ مقامي ڪمانڊرن کي فوري گرفتاري جي ڌمڪي ڏني وئي آهي.
ميڊيا رپورٽن موجب بدخشان ۾ جاري عوامي احتجاج ۽ وڌندڙ اندروني بغاوت کي منهن ڏيڻ لاءِ اسپيشل فوجي فورس پڻ مقرر ڪئي وئي آهي. قنڌار گروپ بدخشان گروپ جي ناراض طالبان اڳواڻن کي گرفتار ڪرڻ لاءِ گرفتاريون پڻ شروع ڪري ڇڏيون آهن. هوڏانهن طالبان ڪمانڊر موسيٰ ڪاڪي ۽ اڳوڻي مائنز ڊائريڪٽر اسلام الدين کي گرفتار ڪري اڻڄاتل هنڌ منتقل ڪيو ويو آهي.
عالمي ماهرن موجب بدخشان ۾ جاري ويڙهه افغان طالبان جي اندر وڌندڙ نسلي ۽ سياسي اختلافن جو واضح ثبوت آهي. طالبان جي حڪومت خلاف ملڪ اندر ۽ ٻاهر نيون تحريڪون مڪمل ڪنٽرول ۽ عوامي حمايت جي ڪوڙن دعوائن جا دروازا کولي رهيون آهن.
