ڪراچي:
اسٽيٽ بئنڪ آف پاڪستان جي مانيٽري پاليسي ڪميٽي ايندڙ اڍائي مهيني لاءِ پاليسي ريٽ 11.50 سيڪڙو تي برقرار رکڻ جو فيصلو ڪيو آهي.
ڪميٽي جو چوڻ آهي ته موجوده معاشي صورتحال ۽ عالمي مارڪيٽن ۾ غير يقيني صورتحال کي نظر ۾ رکندي شرح سود ۾ تبديلي نه ڪرڻ جو فيصلو ڪيو ويو آهي.
مانيٽري پاليسي ڪميٽي پنهنجي جائزي ۾ ملڪ جي معاشي اشارن، مهانگائي جي رجحانن ۽ ٻاهرين عنصرن جو تفصيلي جائزو ورتو. ڪميٽي موجب وچ اوڀر ۾ امن لاءِ مضبوط اميدن باوجود محتاط رويو اختيار ڪرڻ ضروري سمجهيو ويو، عالمي سطح تي خام تيل جي قيمتن ۾ لاٿ اچڻ سان مهانگائي متاثر ٿي سگهي ٿي.
اسٽيٽ بئنڪ موجب خام تيل جي قيمتن ۾ مهانگائي جو دٻاءُ اڃا به برقرار آهي، جنهن سبب مهانگائي جا خدشا مڪمل طور تي ختم نه ٿيا آهن.
ياد رهي ته مانيٽري پاليسي جو آخري جائزو 27 اپريل تي ڪيو ويو هو، جنهن ۾ سود جي شرح 100 بيسس پوائنٽس وڌائي 11.50 سيڪڙو ڪئي وئي هئي. ان وقت، ممڪن افراطي دٻاءُ ۽ ٻاهرين عنصرن کي ان واڌ جو بنيادي سبب قرار ڏنو ويو.
اڄ جو مانيٽري پاليسي جو جائزو مالي سال 2025-26 جو آخري جائزو هو، جنهن ۾ ڪاروباري، ناڻي ۽ سيڙپڪاري جي شعبن کي ويجهي کان ڏٺو ويو.
ڪميٽي جي تازي فيصلي کانپوءِ پاليسي ريٽ ايندڙ ڏيڍ مهيني تائين 11.50 سيڪڙو جي سطح تي برقرار رهندي، جڏهن ته مهانگائي، عالمي تيل جي قيمتن ۽ مجموعي معاشي صورتحال کي نظر ۾ رکندي مستقبل جا فيصلا ڪيا ويندا.
