لاهور جي ڪينٽ ڪڇي ۾ 2 پرڏيهي عورتن سان زيادتي ۽ اغوا ڪيس جي ٻڌڻي ٿي.
ٻڌڻي دوران رضا ڊار سميت 4 جوابدارن کي جسماني رمانڊ ختم ٿيڻ تي عدالت ۾ پيش ڪيو ويو.
ٻڌڻي دوران پراسيڪيوٽر رمانڊ ۾ واڌ جي درخواست ڪندي عدالت کي ٻڌايو ته جوابدارن جا ڊي اين اي ۽ فنگر پرنٽ ٽيسٽ ڪرايا ويا آهن.
پراسيڪيوٽر عدالت کي ٻڌايو ته پوليس ڏوهن ۾ استعمال ٿيل گاڏي سميت ليپ ٽاپ، نقدي ۽ هٿيار هٿ ڪرڻ گهرجن.
ٻن جوابدارن جي وڪيل سلمان شاهد وڌيڪ جسماني رمانڊ جي درخواست جي مخالفت ڪندي چيو ته جوابدارن جو مبينا ڏوهن سان ڪو به تعلق ناهي، پوليس جي پنهنجي بيان موجب ڪيس ريپ يا اغوا جو نه پر ڪرپٽو ڪرنسي تڪرار جو هو.
هن چيو ته معاملو وفاقي جاچ اداري (ايف آءِ اي) جي دائري ۾ اچي ٿو.
پوليس جوابدارن کي منهن تي ماسڪ پهريل عدالت ۾ پيش ڪيو، عدالت جوابدارن جي جسماني رمانڊ ۾ 5 ڏينهن جي واڌ ڪري ڇڏي.
عدالت جوابدارن کي 13 جولاءِ تي ٻيهر پيش ٿيڻ جو حڪم ڏئي ڇڏيو.
يورپي ملڪن هالينڊ ۽ اسپين مان ٻن عورتن جي مبينا اغوا جو واقعو 29 جون تي لاهور مان ٿيو هو ۽ پوليس ان ڪيس ۾ پاڪستان جي نائب وزيراعظم اسحاق ڊار جي هڪ مائٽ سميت 8 ڄڻن کي گرفتار ڪري ورتو آهي.
آچر تي ڊي آءِ جي آپريشنز لاهور فيصل ڪامران پريس ڪانفرنس ڪندي چيو ته لاهور مان ڀنگ لاءِ ٻن پرڏيهي عورتن کي اغوا ڪرڻ واري ڪيس ۾ 8 ڄڻن کي گرفتار ڪيو ويو آهي، جن ۾ وڏي سياسي شخصيت جا مائٽ به شامل آهن، پوليس معاملي جي ميرٽ تي جاچ ڪري رهي آهي.
